ديوان الشاعر : مخلد الحجيري

[ابو خلود]

بسم الله الرحمن الرحيم

السلام عليكم ورحمة الله وبركاته

اطرح بين ايديكم ديوان الشاعر : مخلد الحجيري


قال الوداع و سيّب القلـب يلتـاع=و أقفى و خلاني و أنا في مكانـي
حطّم فـؤادي بالهجـر و البعـادي=والروح ضاعت مع ضياع الامانـي
ويلاه وا ويـلاه وشلـون أبنسـاه=حب ٍ بوسط الجوف شيّـد مبانـي
نهيت قلبي عنه لكـن قبـل منـه=درب ٍ يودي صـوب داره دعانـي
أثر الهوى غـدّار والوقـت جبّـار=والقلب مـا بيـن الثنينـه يعانـي
يا روح روحي يا مسبب جروحـي=لولاك مجبـر مـا تركتـك ثوانـي
لأجلك أنا حبيت و أخلصت و أوفيت=أظميتني و أسقيت عطشك حنانـي
تخطي و أسامح والغـلا بالملامـح=رسمه على وجه المعـذّب يبانـي
يا منتهى العشّاق يا روض الأشواق=يا مبتدي بالصـد هجـرك حوانـي
عاد الهوى ما فيه ذنب و مشاريـه=لكن زماني غصـب منـك خذانـي
سلم الهوى سلمي و فرقاك قسمـي=هذا نصيبـي فيـك ربّـي بلانـي
آمنت بالمكتوب لو كنت مغصـوب=و لو كان وقتي معك دايم عصانـي
يمر عام و عـام تقفـاه الأعـوام=و الوقت بالأوجاع يا مـا سقانـي
الله بلاني فيـه مـا كثـر بلاويـه=هذا الهوى اللي فيه حظّي رمانـي
لو الهوى مضمون ما عشت مغبون=مير الهـوى بحـر ٍ بليـا موانـي
أبحرت فيه بدون رشده و توجيـه=و شافت عيوني ما يخبّي زمانـي
واليوم به قررت وأعلنت و أصدرت=أحيد عن درب الهوى و الهوانـي
موادعه للحب و أرتـاح يـا قلـب=جعلك نسيته مثل ما هـو نسانـي
اللّي برا حالي بعـد كـان غالـي=روّح و خلـى مرقـده بالمحانـي
روّح يجر إخطـاه والعيـن تبـراه=بالدمع ترثـي حالتـي و إحتقانـي
ذرفت دمعي دم ّ من واقـع ٍ حلـم=و بكيت حلم ٍ في الحقيقـه بكانـي
تم ّ الفراق و غلق الحبـر الأوراق=سبحانه الدايـم و الإنسـان فانـي

[ابو خلود]

ياللي على كل الخلايق تفوقّت=زينك يفوق الوصف كلن يشوقه
يا ناعم الخدين بالشوق لك سقت=قلب ٍ ليا شفتك فزع من عروقه
ياللي كلامك همس بالحيل شوقت=لك صاحب ٍٍ سوالفك كم تروقه
كم بالعيون السود يا زين غرقت=و كم من ضحيّه في هواك مغروقه
حتى القلوب الصم ّ بالحب نطقت=و تناهضت بالود لأجلك سبوقه
صافي جبين بحمرة شفاه طوقّت=ريق ٍ كما ذوب العسل من عذوقه
جيدك قصيده في مداها تعلقّت=والعنق شامخ والجدايل طروقه
و صدر ٍ مزم ٍ يا أريش العين ورّقت=طلعه نما بيّن وبان معلوقه
وخصر ٍ وكنّه ضامي ٍ جملة الوقت=أخشى عليه يشيل حمل ٍ يفوقه
هذا قليل الوصف لأجلك تطرقّت=يا وجه كن الصبح لحظة شروقه
فيك المعاني يا هوى الروح عمقّت=و اللي يحبك لك يبيّن خفوقه
البعد عنك يا أريش العين ما طقت=و دموع عيني في غرامك صدوقه
من غيبتك شرب ٍ على زاد ما ذقت=والروح من حزني عليك مخنوقه
ياللّي معك للحب بإخلاص وثقّت=جعل الزمان اللّي يعوقك تعوقه
يا بسمة أيامي و فرحي ليا ضقت=يا من يحيرني بوصفه و ذوقه
ما عاد أكذّب فيك واليوم صدّقت=إن القمر والشمس فيك مخلوقه
وإن طوّل المشوار يا زين و إشتقت=يكفي على شوقك حروفي سبوقه

[ابو خلود]

جيتك ولا أدري شنهو اللـي جابنـي=اللي أعرفه إني على دربك مشيـت
جيتك وشوق الكـون كلـه صابنـي=عدني من الأموات وفي وصلك حييت
مركـب الأشـواق صوبـك قادنـي=ولولا حبك خطـوه يمـك ماخطيـت
ياغـزال الغيـد بالـلَـه راعـنـي=ناظـر بحالـي وعطنـي ماعطيـت
لو عطاني الحـب ومهمـا زادنـي=والله أني غيـر حبـك مـا رضيـت
ولو جميـع الكـون بحبـك لامنـي=مانسيـت الحـب والله مـا نسيـت
ورغم حبـك فـي حياتـي شاقنـي=بأحتمل دامي علـى دربـك وطيـت
لاسهيـت شـوي عنـك جـازنـي=صحَني من حلـم حبـك لا غفيـت
شيء واحد بس !! لو زماني طاعني=جيت يمك ما أنتظرت ولا أحتريـت
قلبـي اللـي بـاع منـه باعـنـي=ذا كلامه يا من لـو صلـه شريـت

[ابو خلود]

(ك)تبت بأسم العيـد أجمـل قصيـده=(ل)وحة عشيق ولهفته صوب من حب
(ع)يد الهنا يـا جعـل ربـي يعيـده=(أ)عوام فيها الخيـر للنـاس يكتـب
(م)ن بحر جـده لا الديـار البعيـده=(و)اصل سلامي للأحبه مـن القلـب
(أ)حلى المشاعر والتهانـي الفريـده=(ن)رسل معانيها بها الشـوق يلهـب
(ت)مّت لنا الفرحه وغنّـوا النشيـده=(م)كتوب نمشي لـو الأقـدام تتعـب
(ب)إحساس منه كاتب الشعـر بيـده=(خ)انه زمانه مالقـى فيـه مكسـب
(ي)بقى جميع اللـي أقولـه وأزيـده=(ر)سمة أمل هي للمخاليـق مطلـب

[ابو خلود]

كل ما رتبت جرحي جاء غرامـك بعثـره=لعنبوا جـرح المحبـه مـا لقينالـه دواء
يا ربيع الورد وردك!! وش حصل ما تنثره=في روابي حب عاشق ضاع عمره بالهواء
أكتم الحب في خفوقي دمعتي مـا تستـره=تفضح القلب المعنى مـن فراقـه ماقـوى
أحتمل ما أحتمل صبـري حزنـي بعثـره=أبتعد بجروح قلبي خوف من هرج الورى
ذاك هو اللي نبت فـي شرايينـي شجـره=دم من قلبي سقيته داخلـي ياكـم جـرى
منيتي أحيى في وصله ولو عيوني تنظـره=وأعترفله إن قلبـي مـن بعـاده إكتـوى
العمر قطعة زجاجـه والمواجـع تكسـره=والهوى منه بيبقى طـول عمـره مافنـى
بأسالك يارب يارحمن ياعظيـم المقـدره=تلهم القلب المشقى سلوتـه بيـوم الهنـا
أذكريني لا تناسي شخـص حبـك ماكـره=ما نساك بحياته ولو دفـن تحـت الثـرى
قلبي ما يقوى فراقك ولا تعـوَدت أجبـره=يتركك ما يذكـرك أستحالـه لـو جـرى
ودام جرحـي مابـرى لازم أنـي أنكـره=ودام عزمتي برحيلك عيشتي موتي سوى
كنت لي حلم عاشق كنت أجمـل منظـره=شايفك فيها خفوقي من خفوقك ما أرتـوى
ليش يوم أني عشقتك كل عشقـي تنكـره=ليش ياكم قلتها ومـن عذابـي مـا درى
بأهجـرك فـي دنيتـك وأي درب تعبـره=بأعكسه وأخالفه لـو معـك كـل الـورى
وهذا حبـك ياهـواي راح ألمَـه وأنثـره=لين جرحي يعترف من طعونك قـد بـرى

[ابو خلود]

نبشت بدفتر الماضي تذكرت اللي قـد فـات=أقلّب في الورق مابين صفحه حلـوه ومـرّه
لقيت الصفحه الأولى طفولـه كلّهـا بسمـات=مابين بيوت هالجيران نطيش ونلعب بكثـره
نزعّل بعضنا أحيان ولكـن مجمـل الأوقـات=نعيش ليومنا أحباب ولا ندري وش بغى بكره
كبرنا وكبرت الأحلام وأختلفت بيننا الوجهات=ونسينا جمعة التحفيظ ولعب السيجه والعكـره
خذانا الوقت وأبعدنا نناظر بعضنا بحسـرات=لهينا في زمن قاسـي ودنيـا كلّهـا غبـره
ولا نذكر سوى الماضي جمعنا وكنّها صدفات=تفرقنـا وتناسينـا حيـاة سهلـه وعسـره
وهذا يروي اللي راح وهذا منطوي بإسكـات=وشخص(ن) غيرهم يروي سوالف كلها ذكرى
وهذا دفتر الماضي طوى في وجهنا الصفحات=وبقى الحاضر لنا وواجب نفكر وش يبي بكره

[ابو خلود]

ناس(ن) عزيزه عن عيوني بعيدين=راحوا وأنا من بعدهم صرت أعاني
فارقتهم بعد العصر يـوم الأثنيـن=يا علّ خلّـي بينهـم مـا نسانـي
اللي غلب في الزين كل المزاييـن=مافيـه مثلـه بالحـلا مودمـانـي
حبست دمعي حايرٍ داخـل العيـن=وذكرت صوته يوم بإسمي دعانـي
وأقـول يالبيـه ويقـول أهلـيـن=يا صاحب(ن) من عقبه الحب فاني
ويقول لا تزعل ترى وقتنا شيـن=ويشهد لنا بالناس قاصـي ودانـي
حبّك وحبّي له وثـوق وبراهيـن=والحظ الأقشر عن دروبك حدانـي
يا صاحبي ذكرك على صاحبك دين=بأوفيه لأجلك كـان ربّـي حيانـي
بعيونها الدمعه رمتنـي بسهميـن=سهم الفراق وسهم حب(ن) كواني
ودوّنت بالاشعار كلمـه بقوسيـن=ماغيره اللـي لـه بقايـا حنانـي
ولو عوضوني به كنوز وملاييـن=ماأحب غيره طول هـذا الزمانـي
وأخر كلامي كـل أبونـا مصليـن=على النبي بأختـم قوافـي بنانـي

[ابو خلود]

زمن قاسي زمن كايد زمن خلّى دموعي تطيـح=على خدّي تسيل آهات وتكتـب للألـم ميعـاد
أنا ما همّني دمعي ولا همّني كثر مـا أصيـح=أنا بس همّي ألقـى حبيـب هـو لـي ميـلاد
ألا ليت الأمل يشرق على حظّي والحزن بالريح=تشيله تبعثره ما تـردّه علـى حظّـي الرقّـاد
ألا يا منيتي يا بهجتي يا غلا هالكون الفسيـح=يا زهره تسكن بقلبي أسقيها الهـوى بإزيـاد
أمانه ماأبي منك سوى عطف ولا أبي تجريـح=عشانك شخص حبيته فـلا تطريلـي الأبعـاد
رجيتك كثر ما ترجي الصحارى للمطر في القيح=إنك ما تعذبني تجيني كما قالو علـى الميعـاد

[ابو خلود]

صوتك جذبني من متاهات الضيـاع=وأهتزت الأشواق في شوق وهيـام
همسك سكن فيني مثل نور وشعـاع=وأشعل في صدري كل معنى للغـرام
أبحرت في بحرك على كيف الشراع=يقودني يمّـك تحـت ظـل الغمـام
منك ومن بعدك أنا عشت الصـراع=وأتخيلك طيـف ٍ يجافينـي المنـام
صرتي حياتي وأحملك فينـي متـاع=مالي غنى عنك وصدّك لـي حـرام
حبك نطقه القلب في الصحراء وشاع=ومنّه ورود العشق ترقص ما تنـام
جعل الديار اللي بها خلّـي وسـاع=ما تضيق دامه درع للحشمه وسـام
هـذا كـلام اللـي كـواه الإلتيـاع=لوعة محب ٍ شق صـدره بالسهـام

[ابو خلود]

قررت أسير الدرب خطـوه بخطـوه=ما أريد أسابق عقرب الوقت وأنـدم
يكفي شكيت الوقـت مليـون شكـوه=وهو مـرار القلـب يسقـي ويطعـم
يالآدمـي دنيـاك مــرّه وحـلـوه=عش دنيتك ما أنـت بالأقـدار تعلـم
وأعرف ترى هالناس في الكون أسوه=عند الذي خالقك مـن شـيء أعـدم
أحدن يحـاول يصعـد العـزّ عنـوه=وأحدن رقى للعـزّ مـن دون سلّـم
أحدن حلم لو صابـه النـوم غفـوه=وأحدن جفـاه النـوم ياكيـف يحلـم
وأحدن يدوّر بيـن الأحبـاب فجـوه=قلبـه حسـود ودايـم الـدوم يظلـم
وأحدن عزيز ومنوتـه خيـر منـوه=لا ما تمنـى غيـر هالشمـل يلتـم
ويا حيف رجلٍ يحكي بهـرج نسـوه=ما ينوخـذ منـه ولا ينعطـى علـم
واللي مريض القلب ما فـاد صحـوه=لا ما صحى منـه ضميـره مهشّـم
الـلاّش قـرر قلبـي اليـوم محـوه=ماله جـدى فـي خوّتـي لـو تلثـم
لا تنخضعلـه وأبدلـه دوم قـسـوه=ولا تستمعلـه وأخصـره لا تكـلـم
وإياك تطلب مـن مخاليـق رجـوه=لا ترتجي غيره ترى الـرب أرحـم
لا ضاق فيك الكـون تكفيـك دعـوه=تدعي بها خالـق يهـودي ومسلـم
وحذراك تفرح كـان شاهـدت بلـوه=أرضى بمقسومك ولا تطـري الهـم
خلّك عزيز النفـس بـك دوم نخـوه=دايـم لفعـل الخيـر بالحيـل مقـدم
لأجل القرايب ضـحّ بالـروح فـدوه=ماهي خساره فـدوة الخـال والعـمّ
وأخر كلامي أطلـب الـربّ عفـوه=ربٍ خلقنـا إثنـيـن حــواء و آدم

[ابو خلود]

الالف أبكتب من ضميـري معانـي=للصاحب اللي بالوفـاء مانسانـي
نسـل الكـرام معززيـن المبانـي=أهل الكرم والجود وأهـل الحميّـه
الباء بيوت العز في كـل مشـراف=دار ولا تحتاج في الوصف عـرّاف
دار بصدر الحي ماهـي بالأطـراف=لا جيـت فيهـا صبّـوا الشاذليـه
التاء تمر أيـام وشهـور وأعـوام=والحال يتغيـر مـن العـام للعـام
قلب ٍ سعيد وقلب تايـه ومنضـام=أحوالهـم مابيـن شمـس ٍ وفيّـه
الثاء ثـلاث ليـال راحـن وقفّـن=وأنا سهير ومشغل البـال بالظـنّ
وحسبي على اللي قلبه اليوم ماحنّ=قلبه خلـي مالـه بعينـي هويّـه
الجيـم جانـي يامخاليـق طريـاه=الصاحب اللي روحي اليـوم تفـداه
اللي ولو طال المدى مـا نسينـاه=في دنيتي محسـوب منّـي وفيّـه
الحـاء حروفـي ماتوفيـه قـدره=يستاهل التبجيد مـن طيـب ذكـره
فوق الجبـال العاليـه دوم وكـره=من يعرفـه فـي دنيتـه واهنيّـه
الخاء خذا منـي عهـود الصداقـه=ونبقى أنـا ويّـاه ربـع ورفاقـه
موثقيـن بحـزم حبـل العـلاقـه=كـل ٍ يـدراي بالمـوده خـويّـه
الدال دونه مرخـص ٍ كـل غالـي=شخص ٍ وفيته مثل ماهـو وفالـي
اللي مرافقني في شمـس وظلالـي=طويتلـه فـي دفتـر الـود طيّـه
الـذال ذا حظّـي وهـذا نصيبـي=ملزوم أعيشه مـع بعيـد وقريبـي
ويا شمس ياللي ناويـه بالمغيبـي=الله يــردك بالسـعـاده علـيّـه
الراء رهنـت الـود بينـي وبينـه=لا ما نقضت العهد بـأول سنينـه
بأحفظ رهانـه دام عينـي بعينـه=وفداه عمري بيـن روحـه وجيّـه
الزاء زارع حبّهـم فـي ضميـري=اللي تعلق فـي هواهـم مصيـري
ماغيره اللـي بالمحبـه خشيـري=متقاسميـن الـود بإخـلاص نيّـه
السين سبحانـه عظيـم الجلالـي=من يعلم بخافـي كنينـي وحالـي
اللي خلق هالنـاس بـأول وتالـي=ولنصـرة التوحيـد مرسـل نبيّـه
الشين شاق القلب زين التواصيـف=حر ٍ عشقته من جميـع المواليـف
خدّه كما القنديل وخشمه كما السيف=ونفسه من الشينـات دايـم بريّـه
الصاد صرت أقول وأقـول وأقـول=وأبني من المعلوم ماهو بمجهـول
وأقول هذا الزيـن ماهـو بمعقـول=زين ٍ كواني فـي المعاليـق كيّـه
الضاد ضيعني وأنـا ضايـع ٍ فيـه=أبو جديـل ٍ فـوق متنـه يمشيـه
هامه وقامـه ربّ اليـوم معطيـه=وبُعده تراه اليـوم جـرم وخطيّـه
الطاء طيور العشق غنّـت معانـا=والشمس صارت مشرقه في سمانا
ومن العـذل ربّـي وربّـه كفانـا=وروحي وروحه بالمحبـه رضيّـه
الظاء ظروف الناس فيها أختلافـي=ظرف ٍ يبين وظرف لاشـك خافـي
هذا مـن الأحـزان يكتـب قوافـي=وغيـره يغنّـي للفـرح سامريّـه
العين عايـم فـي بحـر مـن أودّه=وودي بوصله مثـل ماهـو بـودّه
لكن زمان اليـوم ضـدّي وضـدّه=حسبي على ظروف الزمان العصيّه
الغين غيره لـو حصلـي تركتـه=مالي سوى اللي بالمحبـه عرفتـه
ماألوم قلب ٍ فـي غرامـه شبكتـه=قلـب ٍ تجـرّه يمّـتـه جاذبـيّـه
الفاء فديته فـي حياتـي بروحـي=اللي طيوفه فـي خيالـي تلوحـي
أجيب ذكره في سكوتـي وبوحـي=وأقول وينـه معطـي الـود ليّـه
القاف قلبي يرتجف وسـط جوفـي=من الذي يانـاس عينـي تشوفـي
ليته بحـال اللـي يـودّه يروفـي=ليته يبـادل فـي الخـذا والعطيّـه
الكاف كلـن لـه حياتـه ودنيـاه=يعيشهـا لا مايـرد الـذي جــاه
هذا نصيبـه فـي زمانـه ويلقـاه=أمـا السعـاده أو حيـاة ٍ شقيّـه
الـلام لام القلـب واشيـن عـذّال=ناس صحيح بعالم الحـب جهّـال
ماناظروا رمـش ٍ ليـا لـدّ قتّـال=ماودهم في الحـب نبقـى سويّـه
الميم مد الطيـب ياراعـي الطيـب=وحذراك ثم حذراك ترك المواجيـب
دايم وخلّـك فـي علـوّ المراقيـب=لا لا تسايـر كـل نفـس ٍ دنـيّـه
النون نـاذر ماأستمـع للوشايـه=وأعيش وقتي وأهتني فـي هوايـه
وأقـول ياعـاذل خفوقـي كفايـه=خلّ الخفوق يعيش عيشـه هنيّـه
الهاء هموم القلب واللـي أقاسيـه=شي ٍ مقـدر فـي حياتـي ألاقيـه
والهم غادي بيـن بايـع وشاريـه=دنيـا وفيهـا كـم أمـور ٍ خفيّـه
الواو وصـلّ لـه سلامـي وقلّـه=ياطير خلّـك صبـره اليـوم ملّـه
عطه الجواب وهـات ماقـال كلّـه=وبلغه مـن قلبـي سـلام وتحيّـه
الياء يديني تكتـب آخـر كلامـي=والله يجنبـنـا دروب الحـرامـي
وصلاة ربّي عـد ماطيـر حامـي=على النبـي سيّـد جميـع البريّـه

[ابو خلود]

لا يازمن وشلـون غيّـرت حالـي=وأصبحت تلعب بالمشاعر والأحساس
مامـر يـوم فـي حياتـي هنالـي=كنّ الحزن ماعرف غيري من الناس
فكرت تشتت هم ٍ على قلبي عنالـي=سنين عمري عشتها كتم الأنفـاس
كل البشـر مابيـن مـر ٍ وحالـي=وأنا الذي عشت المعانـاه بقيـاس
كل الحـزن نـوّخ ركابـه وجالـي=عـزّاه ياقلـب بالأهـوال غطّـاس
فارقت انا وقت المـرح والتسالـي=وسطّرت همي في حياتي بقرطـاس
هم ٍ تعلّـى فـي خفوقـي وجالـي=هم ٍ خذيته وأنزرع وسط هالـراس
دنيا خذت من طيّب النـاس غالـي=وصار الذي ينحب بالنـاس هـلاّس
لكنّهـا تبقـى بـذكـر الرجـالـي=اللي لهم في محضر العرف نبـراس
ناس تحب الكيـف وسـط الدلالـي=واللي خذلهم دايـم الـدوم ينـداس
يامـا خـذا منـى ولاهـو عطالـي=وقت ٍ جحود لمـدة الطيـب يانـاس
محروم حتى مـن مناظـر ظلالـي=لا ويش ياحظّـي أعلنـت الإفـلاس
زمن عجيب لو في لحظـه صفالـي=سنين من عمري حكمها بالأتعـاس
يقطعـك دنيـا كلّـهـا للـزوالـي=بايعك يا دنيا العنا لأرخص النـاس
لا تامن الخاين ولـو كـان غالـي=وأبعد عن الواشين ومن قيل جسّاس
عمر الزمن مايعرف اللـي جرالـي=مايوم واسانـي ولا قـال لا بـاس
طالبـك ياربـي عظيـم الجـلالـي=تبـدل الأحـوال وتوثـق السـاس
في ليلة ٍ عتمه ما مثلهـا بالليالـي=تكتب نهاية قصة الحـزن واليـاس

[ابو خلود]

قالوا غيابك طال!! وين أنت عنّـا=قلت السموحه ظرف وقتي عصاني
جريّت أنا من قاسي الوقـت ونّـا=ونة عزيزٍ ضـاق فيـه الزمانـي
قلبي عليـه الجـرح يامـا تغنّـى=وصرخت صرخه من صميم المحاني
على الـذي بالهجـر فينـي تجنّـا=حسبي عليه اليوم سبـع وثمانـي
كنّه غريـب منتحـي عـن وطنّـا=ما كنّه اللي فـي حياتـي هوانـي
لكـن دامـه راح جعلـه تهـنّـى=جعله يحقق بعدي أغلـى الأمانـي
دامه في بعدي كفّـه اليـوم حنّـا=بأنساه يومه فـي حياتـي نسانـي
مابيه يذكـر كيـف وشلـون كنّـا=مادام قلبي عـن غرامـه نهانـي
السن ضـدّه فـي المعاديـل سنّـا=واللي يخون العهـد مالـه أمانـي
كانه رخيص يشـوف حنّـا ثمنّـا=غالي ولا أحدن ياصلـه بالبنانـي
ترى الـذي بيـن المخاليـق دنّـا=يعيش طول العمـر للـراس دانـي
لا خانتـه دنيـاه لا يقـول خـنّـا=ماخانـه إلا طبعـه اللـي أنـانـي
لا يكثـر الهوجـاس ويزيـد ظنّـا=لا مابغيت إلا الـذي هـو يبانـي
خلوّه يرحل يغتـرب عـن وطنّـا=مابيه مـا أبـي شوفتـه بالعيانـي

[ابو خلود]

يا وقت دوّن مـا حصلـي وسجّلـه=في صفحـة التاريـخ دوّن حياتـي
أكتب جميع اللـي جرالـي وفصّلـه=وأنقش حروف الوجد من وسط ذاتي
بالـزاج حررلـه كلامـي وحمّلـه=أشوق عين مـن الولـه ذارفاتـي
خبّر بعيـد الـدار قولـي ووصّلـه=علّـه يحـس بغربتـي والشتاتـي
علّـه بعـد يقـرأ كلامـي يشكّلـه=ويعرف حقيقة قلـب مايـوم باتـي
قلب ٍ كواه الهـم والحـزن طايلـه=قلب ٍ بعد فرقـاه شـاف المماتـي
قلب ٍ يشيل الحب والحـب شايلـه=ماحب غيره هو حسيـن الصفاتـي
أبو عيـون ٍ دعـج ربـي مجمّلـه=والزين منبـع عينـه الناعساتـي
سواد ليلـي منبعـث مـن جدايلـه=وبركان قلبـي فـي شفايـاه باتـي
بالحيـل أحبّـه وأعشقـه وأتأملـه=نـور الليالـي يومهـا حالكـاتـي
أزعل على اللّي في حياتـه يزعلّـه=ورضاها بالدنيـا يحقـق رضاتـي
لو درت هذا الكون كلـه ومجمّلـه=مانـي بلاقـي دونـهـا نايبـاتـي
ربيع قلبي مرتـوي مـن مناهلـه=وأشـواق قلبـي قبلهـا جاثياتـي
كل العـذارى فـي حياتـه تجاهلـه=قهرهـن اللّـي عينهـن شايفاتـي
ياكيف أبوصف زين خلّـي وأكمّلـه=وأوصـاف خلّـي كلهـا نادراتـي
ليت الزمن بيعـود مـره وأقابلـه=واذكّــره بايامـنـا الماضيـاتـي
ليته يسوق الـروح يمّـة منازلـه=دار ٍ بهـا مضنـون قلبـي يباتـي
ياجعل داره ترتـوي مـن مخايلـه=وينبت بها الروض الخضر والنباتي
ليت الـوداع المـر ماهـو بقابلـه=ليت الوداع يكون عقـب الوفاتـي
يرتاح قلب ٍ همّـه اليـوم مشغلـه=هم السنيـن اللـي لنـا مقبلاتـي
يابو علـي جالـك كلامـي محلّلـه=قلته لعـلّ المـزن بالغيـث ياتـي
أبحر في بحر ٍ جمّ مـاودي أدخلـه=بحر الغرام اللـي مسبـب نهاتـي
والمسعد اللي كل شـيء ٍ يحصّلـه=ماهـو بمثلـي عايـش الذكرياتـي
لكـن هـذي حكمـة اللـي منزّلـه=كلامـه اللـي نذكـره بالصـلاتـي
رب ٍ خلقنـا دايـم الـدوم ناصلـه=ندعيـه يرزقنـا بحسـن الثباتـي
ودار الزمان وشفت فينـي فعايلـه=وعايشت وقتي مع هناي وشقاتـي
ومن يمهل المخلوق ولايوم يهملـه=أدعيه يحفظ نور عينـي وغناتـي

[ابو خلود]

ما أدري وش اللي في هواهم رماني=اللي هواهم فـي فـؤادي وثيقـي
من بعدهم يا خوك حزنـي دعانـي=واستوحشت دنياي وإزداد ضيقـي
أصبحت أسير الهم وحدي أعانـي=تايه وأجهل كـل شـيء بطريقـي
تموت في قلبـي جميـع الأمانـي=وتحيا الهموم اللي لدربـي تعيقـي
يا حسرتـي ياليـت قلبـي نهانـي=ليته وليتـه مـن هواهـم يفيقـي
غريب وأشكي ما حصل في زمانـي=أروي عذاب ٍ في حياتـي عتيقـي
وقتي خذا مني و لا هـو عطانـي=وقت ٍ به المظلـوم مالـه رفيقـي
شيّعت جثمان الأمـل فـي مكانـي=وأبحرت في بحر ٍ غزيـر غريقـي
شمس الأمل غابت ويأسـي لفانـي=ودمع الألم من وجنتـي ذا يريقـي
راحت سنيـن ٍ ماضيـه بالتفانـي=وراح الصديق بدنيتـي والعشيقـي

[ابو خلود]

دمعه من عيوني على خدّي إنزلـت=من قسوة المنظر وذيـك البشاعـه
دمعه معاهـا كـل هالدنيـا بكـت=تقول ويـن الحـق منـه أضاعـه
في طفلة ٍ في عمرها لا ما أهتنـت=وش ذنبها تحرق بذيـك الفضاعـه
سلطانه اللي كـل بسمـه إزرعـت=سلطانه اللي توّها فـي الرضاعـه
سلطانه اللي مابعـد منهـم شكـت=طفله ولا تعرف حصـاد و زراعـه
لكن بكره كيـف لا منهـا كبـرت=وش ردّنا والحـق شفنـا ضياعـه
اللي يقول الحـق ماعمـره سكـت=واللي يشوف الظلم يلـزم قطاعـه
من ينصر الطفله ليا منها صرخـت=وسط الأهل والدار تطلـب شفاعـه
جعل اليدين اللـي لطفلـه عذبّـت=تقطع وترمـى للكـلاب المجاعـه
وجعل العيون اللي في هذا ما أعدلت=يحكـم عليهـا بالعمـى ياجماعـه
ستة شهور بلمح نضـره إنقضـت=وكم جلدة ٍ حكم القضـاء للبشاعـه
وش عاد يبقى للمآسي مـا حكـت=وش عاد يبقـى للألـم والفجاعـه
دام المحاكـم للعـدالـه وخّــرت=من ينصر المظلوم ويـرد صاعـه

[ابو خلود]

بسم الله الرحمن خيـر أبتدابـه=الخالق الرازق و للذنـب غفّـار
نخشى عقابه يوم نرجـي ثوابـه=رب ٍ خلقنا نطلبه سـر ّ وجهـار
سر يا قلم وأنقش حروف الكتابه=من هاجس ٍ ما يتعبه رد الأشعار
للّي تهيّض هاجسـه يـا هلابـه=يا مرحبابه قاف من نسل الأحرار
يقول أبـو ديّـه وقولـه طرابـه=وأنا على ما قال شاهد ومحضـار
وقت ٍ تمرّد يقهـر اللّـي حيابـه=وعزّي لمنه للغبـن دوم صبّـار
وقتي و وقتك كـل منّـا لهابـه=مير الليالي مـا تعلّـم بالأقـدار
جرح ٍ يجـر الآه جـر الربابـه=آنسه في جوفي كما دق الأوتـار
أحدن يشق الجيب من حر مابـه=وأحدن كتم في داخله مر و أمرار
وأحدن حياته بين حـزن وكآبـه=وأحدن يرافقه الفرح طول الأسفار
ما كل فارس سيفه أجود نصابـه=ولا كل فارس يحتمل هول الأخطار
أحدن ولا حـرك جـواده ترابـه=وأحدن ليا أقدم يجي كنّه إعصـار
وما كل من يعرف ترى العلم جابه=ولا كل تربه تنبت أشجار وأثمار
أحدن كلامه فيـه منطـق لبابـه=وأحدن كلامه يلزمه كسر و جبار
بيت ٍ وما كن حي يـوم ٍ وطابـه=ما ضافه الشيخان أو زاره المـار
وعزّي لمن له صاحب ٍ ما وشابه=حتى الوشايه بينهـم دوم تحتـار
العلم مطلب والجهل لـه حرابـه=وأنته فهيم وتقدر اليـوم تختـار
سعيد أبـو ديّـه طويلـه رقابـه=قال الحقيقه صادق القول ما بـار
والواقع اللي عايشينه تـرى بـه=أسرار مخفيه عن صغار و كبـار
وأنا أشهد إنك من عرين الذيابـه=يا ذيب تعوي ما أنت يا ذيب مكّار
كلام مخلد عزوتـه مـن شبابـه=شعره يقوله واصلن كل الأقطـار
جالك جوابه دون حلف وطلابـه=والشعر جزله باهض ٍ غالي أمهار
و على النبي سيّد جميع الصحابه=أزكى صلاه ختامها طيب و أذكار

[ابو خلود]

مرثية الشيخ عبدالمجيد البشري الحربي



يا الله يا خالق لنا الشمس والنـور=يا عالم ٍ بأسـرار فكـري و حالـي
تجبر عزا قلب ٍ من الحزن مكسـور=و تقبل دعايه يـا عظيـم الجلالـي
ترحم لنا شيخ ٍ على العـز مخبـور=ابن حمادي مـن عزيـز الرجالـي
عبدالمجيد اللّي علا نايـف القـور=راع الجميلـه مـن قديـم و تالـي
تشهد له العربان بالطيـب مذكـور=و ذكره مغطّي مثـل نـوّ الخيالـي
الموت حق و لا لنـا فيـه مقـدور=لو هو خذا منّـا عزيـز ٍ و غالـي
و العين لو تبكي من الحزن و الجور=لـزوم تقنـع لا حدتهـا الليـالـي
ذي حكمة اللّي كاشف ٍ كل مستـور=اللّي عطى و اللّـي خـذا بالتوالـي
نرضى بما يكتب و لا نخلف الشور=و اللّـي مقـدّر واقـع ٍ لا محالـي
و المبتلى دايم على الصبر مجبـور=لو هو ضحك ما هو من الهم خالـي
و بيت المعزّه دايم الـدوم معمـور=لا غاب نجـم ٍ نجـم بعـده يلالـي
و العز في فـواز لا شـك مذخـور=شيخ ٍ و له عـزوه تهـد الجبالـي
حنّا يمينه لا غدى الوقـت بعسـور=نفـداه لا منّـه طلـب مـا نبالـي
و أزكى صلاه معطّره طيب و بخور=على شفيع الخلق وقـت السؤالـي

[ابو خلود]

يقول مخلد من على راس مرقـاب=ويقيّس المعنى على كـل هنـداب
ويالله ياللّي من ترجاك مـا خـاب=تغفر لي ذنوبي علـى مـر الأيـام
راجيك أنا يارب يا قاضي الشـان=تنعم علينـا بالهدايـه والإحسـان
يا خالق ٍ هالناس في كل الأوطـان=ونحمدك يوم إنا على دين الإسـلام
البارحـه هيّضـت ممـا جرالـي=أصبحت أعـد أيامنـا و الليالـي
دنيا و فيهـا مـر علقـم وحالـي=ولا غير وجهك يا إلهـي بهـا دام
خذاني الهاجوس في وصف مزيون=حلو ٍ لبيب وبه من الزين مخـزون
يفداه كل اللّي مشى فوق هالكـون=اللّي بزينه منطق ٍ صـمّ الأصنـام
أعطاني عهود المحبـه ولا خـان=مخلص وفي دايم على مر الأزمان
ياعاذلي ما أنساه لو كان ما كـان=يكفي سهرتـه و المخاليـق نيّـام
و يا رافعن سبـع ٍ بليـا عمدهـا=ترحم خفوق ٍ ما أهتنا من بعدهـا
وعزّي لمن له حاجـة ٍ ماوجدهـا=يمشي يمن و الحظ قافيـه للشـام
وأنا ادري انه لو رحل ما نسانـي=لكن ظروفه تمنعـه لـو عصانـي
واللي خلق هالناس قاصي ودانـي=يسوى أهالي نجد واللي بها حـام
دنيا على طول الدهر مـا صفتلـي=لا جيت أبشكي من همومي شكتلي
ولا جيت أبضحك عاندتني وبكتلي=راحت حياتي كلها عنـاد وخصـام
من يستحق أبيع عمـري عشانـه=غير الذي في وسط قلبـي مكانـه
ولو عشت طول العمر بأحفظ رهانه=ما أخون عهد ٍ بيننـا دام لأعـوام
كنز المحبّه غالـي ومـن يلاقيـه=يسعد و طول العمر تهنـى لياليـه
وأدعي عسى ربي يحقـق أمانيـه=منه بدنيـا الحـب يبنيلـه أحـلام

[ابو خلود]

فديـت الكـأس بيدينـك حبيبـي=فديـت القهـوه ومـن صبهالـك
فديتك يـا أعـز النـاس عنـدي=فديتـك ليتنـي دايــم قبـالـك
فديـت العيـن ورمـوشٍ ضليلـه=فديتـك لا حشـى مافـي مثالـك
أنا لـو مـا شربتينـي شربتـك=ضما قلبي عطش يبغـى وصالـك
أنـا قلبـي ينـادي دوم اسـمـك=وناسي كـل مـن يعـرف وفالـك
أخايل صورتك في وسـط عينـي=و أخايـل مـدّة يدينـي لـدلالـك
أقهوي هاجسـك بأشعـار فكـري=وأصب الحب فـي كاسـك لحالـك
وأذوق التمـر بشفاهـك و أغنّـي=(حشى ما طابلي شخص ٍ بدالـك)
أحبك يا قمـر ضـاوي وساطـع=تنـوّر قلـب يعشقـك وصفالـك
حبيبي كيف صوتك غاب غاب عنّي=!! تمنيني !! وأنا بالصبـر هالـك
أنا ما أبغـى فراقـك لـو دقيقـه=مشيتـك قلـب لدروبـك مشالـك
ألا يا ليت ظـرف الوقـت يسمـح=واعيش العمر كلّـه فـي مجالـك
ألا يا هقوتـي و أغلـى الأمانـي=أنا شمسـي دفاهـا فـي ظلالـك
أنـا عاشـق متّيـم فيـك مغـرم=حقيقة قلـب غـارق فـي دلالـك
يقولـون الوفـاء كنـز المحبـه=وأنا أقول الوفاء كنّـزه خصالـك
أحبّـك حـب مـا راح يتـكـرر=لأنـه حـب مـن قلبـي تمالـك
أنا أدعي كل ليلـه مـن خلقنـي=عيوني تنظـرك وأجلـس قبالـك
تعالـي وأشربـي فنجـال حبّـي=تعالي و أجلسي لا يضيـق بالـك

[ابو خلود]

قالوا تعرفه ؟؟ قلت : لا شك معـروف=عزيـز غالـي مـا عرفـنـا مثيـلـه
قالوا تعزّه ؟؟ قلت : بالحيـل ملهـوف=ودّي معـاه أقضـي ليـال ٍ طويـلـه
قالوا تحبّه ؟؟ قلت : مطبوع بالجـوف=حـبّـه و لا يمـكـن أدوّر بـديـلـه
قالوا تشوفه ؟؟ قلت : يا جعل ما أشوف=غيـر الـذي حبّـه بقلبـي أشيـلـه
بالحيل أحبّه حـب مـا داخلـه خـوف=حـب ٍ طريتـه كـل يـوم ٍ و ليـلـه
ذكره يراودني مـع الوقـت و يلـوف=قلب ٍ نهـره الوقـت و أبعـد عميلـه
ما غيره اللّي من عنـا قلبـي يـروف=يا ويـن ألاقـي وقـت يوفـي قليلـه
قلبي بعـده سنيـن للحـزن معطـوف=يبكي و يشكـي للدهـر جـور ميلـه
و قلبي على غيره من الناس مصلـوف=يا كيـف قلـب ٍ يغتنـي عـن خليلـه
لا من تكلم يسكـت الشعـر مكسـوف=وكـل القوافـي جزلـهـا تنتخيـلـه
ولو تنكتب في حقه حـروف وحـروف=ما اعطوه غيري من حـروف ٍ جزيلـه
يكفيني إني ذقت مـن حبّـه رشـوف=ويكفيـه قلبـي يـا هلـي ينهديـلـه
و من لامني بالحـب ماهـو بمألـوف=عمـره ولا يلقـى لـدربـي وسيـلـه
الحب من عندي تـرى اليـوم مكلـوف=بأكون له لـو عشـت أنـا مستحيلـه

[ابو خلود]

نذر ٍ نذرته لأكتب أحلى القصايـد=و أطرب بها مسمعك يا نور عيني
و ألبّس الحرف بوصوفك قلايـد=و أجمعلك نجوم السما في يدينـي
و أطوّع المعنى و لو كـان كايـد=و أقطف بها ورد ٍ على ياسميني
ياللّي هواك بداخل الـروح قايـد=إمّا أجيـك اليـوم و إلّا تجينـي
من هول زينك صرت للحسن قايد=ما شفت مثله طول مـدّة سنينـي
جمعت في زينـك كثيـر الفرايـد=يا حبّـي الطاهـر و أول حنينـي
وصلك حبيبي صار ضمن العوايد=ما أقدر بدونه دنيتي مـا تزينـي
يا أغلى من الغالي لك القلب رايد=خلّك بجوفـه باسـط الراحتينـي
و إن طالت الدنيا فلانـي بحايـد=عنّك و بأقهـر جملـة العاذلينـي
ربي يديمك فالرخـاء و الشدايـد=و يدوم نبض الحب بينك و بيني

[ابو خلود]

مرت ثمان و عشر لأغلى المخاليق=يا جعلها من عمري اللّـي بقالـي
الغالي اللّي بالهوى قربـه يليـق=حشى و لا غيره من الناس غالـي
عسى حياته كـل أبوهـا توافيـق=و من وين ما وجه عن الهم سالي
مقابله يبعد عن الخاطـر الضيـق=و مفارقه شمس ٍ هـوت للزوالـي
كل المشاعر صوب خلّي مطاليـق=بإسمه قرن كل الحـلا و الجمالـي
حبّه معي مكنون بأقصى المعاليـق=منقوش ما بين الضلوع النحالـي
أرض ٍ بها خلّي عساها مواريـق=تخضر و يفرش وردها كالزوالـي
عز الله إنّي من هوى غيره معيق=حيثه على قلبي من سنيـن والـي
من بد كل البيض جمله و تفريـق=حبّـه تـورّث بالحشـا لا يزالـي
أشوف زوله مع جميـع التفاريـق=و من وين ما لدّيت شفتـه قبالـي
بيني و بينـه بالمحبـه مواثيـق=ما غيرتهـا طبـع سـود الليالـي
إسمي و إسمه في سجل العواشيق=خضنا حياة العشق بـأول و تالـي
و غنّت لنا الدنيا بحلو الطواريـق=و شدى بها طير المواليف عالـي
يقوله اللّـي هيضتـه الشواهيـق=في نايف ٍ مبـداه روس الطوالـي
يالله تفتحـلـي دروب ٍ مغالـيـق=منها تيسرلي مـع الوقـت حالـي

[ابو خلود]

جالك حبيب الروح يا دوحة قطر=جالك بعد ممشاه تالـي عصيـر
جالك و أنا قلبي يجاوبه الخطـر=متى يحوّل صوب خلّه بالمسيـر
يوم الثلاث إنهل دمعي و إنتثـر=على فراق الزين مدعوج النظير
دمع ٍ من عيوني على خدّي حدر=و الروح تتبع خطوته ما تستشير
زاد المسافه بعد و القلب إنشطر=و عيني تراقب جيّت الحب الكبير
الغالي اللّي له عيونـي تنتظـر=اللّي بدونه صرت يالدوحه ضرير
حبّه بقلبي فاق تصويـر البشـر=حب ٍ سمته الطهر معلوم المصير
إشتقت له شوق الفيافي للمطـر=ما غيره اللّي يجبر القلب الكسير
الله يرده لـي و بلمـح البصـر=أشوف زوله قدم عيني لي يسير
ساكن معاليق الفؤاد و مستقـر=متربع ٍ وسط الحشا ماله خشيـر
له دنيتي له كل مالي من عمـر=متسيد ٍ بالزين سيـد الغناديـر
أهواه قد الكون و أيـام الدهـر=و أغليه دون الكل بالحب الوفير
لا غاب لحظه كنّها عندي شهـر=متى يرد و يفرح بشوفه سديـر

[ابو خلود]

يا نجد لي عندك وصيّـه تحفظيـن=مضنون قلبي مالك الروح والعيـن
اللّي ليا من جاك زانـت رياضـك=و تبسّمت لأجلـه ورود البساتيـن
اللّـي عشقـتـه دون ذولا و ذولا=و اللّي رسمته بالهوى بين قوسين
الغالي اللّـي عانـق الـروح ودّه=أهنى ليا شفتـه يفـل الحجاجيـن
قلبي يدوكه شوق و يهـز عرشـه=غرام يسـري داخلـي بالشراييـن
لمقابل اللّي صان عهـد التصافـي=و لا غيّره يمّـي كـلام العذوليـن
ودّي له أبسط بالثراء كف يمنـاي=و أظله من الشمس و أمشيله سنين
و أبني له بجوف الحشا بيت عامر=فيه الحشم ويّا الخدم لـه مقيميـن
يامـر و كـل اللـي يبيـه يتلبـى=و إرضاه عندي غاية مالها اثنيـن
الله وهبني له و هـو وهبـة لـي=من خالق الامه على مذهب وديـن
ما همّنا كل الـذي قيـل و إنقـال=حيث إننا بالعشق صرنـا شقيقيـن
و الله ليا من راد ما أحـبّ غيـره=لو عرضولي غير زولـه ملاييـن
شوفه طموح القلب و إلقـاه شفّـه=و معانقه نبت الزهر و الرياحيـن
ما أطيق بعده لا و لا أطيق صـدّه=ودّي به و لا ودّي أطريـه للبيـن
عسى اللقا مع نور عينـي يتجـدد=و أهنى بشوفه مثل كـل المواليـن
اللـي يحاكونـه و دايـم يرونـه=و أنا بعيد و هـم لـداره قريبيـن
أنا أشهد إنّي فالهـوى بـه متيّـم=اللّي قلب للزيـن كـل الموازيـن
يا ليت لو يدري عن اللّي جرالـي=من يوم ما قفّى و أنا خاطري شين
أضيق و الدنيـا تضيـق بعيونـي=دربي وحش و إخطاي ماهيب ثنتين
مكسور ساق و ظلع بالصدر ينزف=للموت يدنيبي و لا بـه مواسيـن
ما ني بعاتب خلّـي أليـا هجرنـي=معاتبي للوقـت وشلـون بيزيـن
حماه ربّي مـن مصايـب زمانـه=وعسى المصايب عن عيونه بعيدين
يا جعـل عمـري دايمـاً فدوتلـه=فديته من الناس الاقصى والادنيـن
ربي يحفظه وين ما وجـه إخطـاه=و تُعمى عيون ٍ تتبعه من حسودين
هذي وصاتي يـا ريـاض المـوده=قومي بها واستقبلي خلّـي الزيـن

[ابو خلود]

راكب اللّـي وارد اليابـان مسيـوق=لكزس ٍ سوَاقها ما نقص غير الخـوي
للمسافـات الطويلـه حيـل معشـوق=كن به لا من ركبته ذيب يقنب و يعوي
واجهة صقر ٍ تعلـى بالسمـاء فـوق=له جناحين تدلـك فالمسـار الملتـوي
دزِبه يا خاطري صوب دار اللّي تروق=له معاليقي و فزَة خافق ٍ به مهتـوي
لأبو عيون ٍ تنهـب القلـب و تبـوق=منها غدى قلبـي بصـدري مكتـوي
الله يبيحـه عـد مـا قيـل منطـوق=على اللسان و عد مـا شـاء القـوي
الله عليـه العمـر لإرضـاه معتـوق=أنا أشهد إنَـه فالبشـر مالـه سـوي
مترفع ٍ عن كل نقـص ٍ و لـه مـوق=ما لدّت لغيـري مـن النـاس بـدوي
قولولـه ان القلـب بيديـه مسـروق=قولوله ان الشـوق جمـره مستـوي
حبي لهم حب البـدو لأشقـر النـوق=ياعـل عينـي عنهـم مـا تنـزوي
وجدي عليهم وجد من صابه الشـوق=و دمـوع عينـه بالمحاجـر تنطـوي
يجر لحـن الـود مـن كـل طـاروق=و يخاشـر الونَـات صـدره بالعـوي
أوااااه ليت الدار تقـرب و أنـا أروق=سديـر نـور الكـون كلـه تحتـوي

[ابو خلود]

ليت الهوى يا مالك القلب بنبيـك=عن حالة اللّي ما توجّـد بغيـرك
و ليت اللقا للي يـودّك و يغليـك=يكتب و يسجعلي مع الود طيـرك
يا اللّي بدونك حالتي مـا تسلّيـك=داو الجروح الداميه من ضريـرك
يا منيتي بالوقت روحـي تناديـك=جاوب ندى روح ٍ بصدري تجيرك
تزايـدت بالهـم تتبـع مماشيـك=وقفت على بابك تناجـي عبيـرك
صاحت تردد بالحشا حيل شاريـك=لا تبيع ود ٍ مخلص ٍ به ضميـرك
جيتك و حاكيت الغلا فـي مبانيـك=و حلّفتها للوصل تقنـع هجيـرك
قالت علام الدمع بالعيـن غاشيـك=جرّحت خدّينـك بدمعـة نظيـرك
هذا الجفا يا دار من واحدن فيـك=يبيني أنسى وقفتي في ((سديرك))
يبيني أنسى ماضي العهد يرضيك؟؟=و أنا لمن تحوين دايـم خشيـرك
مير أطلبي يـا دار والله لا ألبّيـك=غلاك عندي ما أحـدن يستعيـرك
إن طال عمري بالمحبه لأراعيـك=و يبقى مصيري ما حيينا مصيرك
تذكّري قبل الوعد يوم أنـا آجيـك=تذكّري قلـب ٍ فـلا حـب غيـرك
ليت الهوى عن جملة الخلق يدنيك=صوبي و أوادع يا وليفي هجيـرك

[ابو خلود]

ليت الهوى يا مالك القلب بنبيـك=عن حالة اللّي ما توجّـد بغيـرك
و ليت اللقا للي يـودّك و يغليـك=يكتب و يسجعلي مع الود طيـرك
يا اللّي بدونك حالتي مـا تسلّيـك=داو الجروح الداميه من ضريـرك
يا منيتي بالوقت روحـي تناديـك=جاوب ندى روح ٍ بصدري تجيرك
تزايـدت بالهـم تتبـع مماشيـك=وقفت على بابك تناجـي عبيـرك
صاحت تردد بالحشا حيل شاريـك=لا تبيع ود ٍ مخلص ٍ به ضميـرك
جيتك و حاكيت الغلا فـي مبانيـك=و حلّفتها للوصل تقنـع هجيـرك
قالت علام الدمع بالعيـن غاشيـك=جرّحت خدّينـك بدمعـة نظيـرك
هذا الجفا يا دار من واحدن فيـك=يبيني أنسى وقفتي في ((سديرك))
يبيني أنسى ماضي العهد يرضيك؟؟=و أنا لمن تحوين دايـم خشيـرك
مير أطلبي يـا دار والله لا ألبّيـك=غلاك عندي ما أحـدن يستعيـرك
إن طال عمري بالمحبه لأراعيـك=و يبقى مصيري ما حيينا مصيرك
تذكّري قبل الوعد يوم أنـا آجيـك=تذكّري قلـب ٍ فـلا حـب غيـرك
ليت الهوى عن جملة الخلق يدنيك=صوبي و أوادع يا وليفي هجيـرك

[ابو خلود]

ياللي تون العمر مـا هـو بيوميـن=دنيـاك دايـر فـي حياتـك رحاهـا
تفرحك يوم و بـاق الايـام مايبـن=هـم و تفاكيـر ٍ كفـا الله بـلاهـا
مثلك وحيد و دمعتي تطلـب معيـن=اللـي عليـم بكـل شـيءٍ طواهـا
شكيت حالي مـا لقيـت المواسيـن=و ابكيت عيني و إنتثر حـر ماهـا
من علم الذيب العوي حـزة البيـن=غير الهموم اللي بصـدري عواهـا
شبيت نار الـود و احرقـت ثلثيـن=عمري و ثلث ٍ حايـم ٍ فـي لظاهـا
أعيش يومي و أذكر ليال و سنيـن=عـدّت علـي بمرهـا مـع حلاهـا
عدّت و راحت منّي أربع و عشرين=أسايـل المعبـود يحسـن جـزاهـا
و أستغفر الله من خطاياي و أديـن=نفسي و لا ألوم الزمن فـي خطاهـا
ذي حالة الأيام من زيـن لا شيـن=و اللّي بدى فيهـا يصـل منتهاهـا
كـل ٍ بياخـذ قسمتـه و الله يعيـن=منـه يـدور بالليـالـي رضـاهـا
دنياك رحله دربها يسـار و يميـن=و المبتلى اللي يمنهـا مـا ممشاهـا
لا تغرك الاحـوال و تقـول بعديـن=مسـرع بهالدنيـا تكـدّر صفـاهـا
ناس ٍ بها تقبـل و نـاس ٍ مقفيـن=حكمـه لعقـل ٍ يمتعـن فـي بناهـا
لا ترتجي فيها على العسر و الليـن=تجفاك لـوّك مجتهـد فـي رجاهـا
اغنم حلاة الوقت و اعرف على وين=رجلك تبي تمشي و حسّـن خطاهـا
واعرف صديقك واعرف اللي معادين=و الطيبـه عطهـا تلاقـي كمـاهـا
يا ذيب خذهـا ونتـي كانـك تعيـن=آنا تعبـت مـن الحيـاة و غثاهـا
أقولها مـن فـوق هـدّ الشياهيـن=في مرقب ٍ مابين الارض و سماهـا
عديتبه من ضمـن نـاس ٍ معدّيـن=أشكي على سـود الليالـي شقاهـا

[ابو خلود]

يا أحمد نصيتك من عنا جور الأيـام=حالي مـن الفرقـا طواهـا نكدهـا
عايش على ذكرى مضتلي من أعوام=مع حسين الـدل ّ مطلـق جسدهـا
طفل ٍ سلب عقلـي و ورثلـي آلام=من سبته روحـي خطيـر ٍ جهدهـا
اللّي نما في خده زهـور و إخـزام=و يظلها رمش ٍ صحى مـا رقدهـا
أقعد معه بالود و إن لـد ّ لـي قـام=حظ السنيـن اللّـي فقدنـا سعدهـا
قفّى و أنا واقف على خط الأحـلام=أسأل عسى درب ٍ مشيتـه وجدهـا
و اليوم شفته واقف ٍ ينظـر لشـام=بنفس الطريق اللّي بوعدي وعدهـا
شفته يذر ً الرمل و دموعه إزحـام=على شفـاه اللّـي طغاهـا شهدهـا
وأنا عجزت أستنظر دموع و إلثـام=و طفل ٍ يلاعب دمعها مـا سندهـا
قفيت بجروحي على جرحـي العـام=و ودعت لحظه شفتها مـع ولدهـا
عزّي لحالي كيـف تاهـن الأقـدام=عن دار خل ٍ ناض بـارق رعدهـا
أثر الليالي صفوها صعـب مـا دام=و قلوبنـا مقسومهـا مـا وردهـا

[ابو خلود]

لا يا بحر وشفيك ما تسمع الصـوت=عليت صوتي و أنجرح مـا سمعتـه
أبني على شطك عمارات و بيـوت=و جارك يهدم بناي و اللي عمرتـه
متوكلن بالرجاوي و الأماني سبـوت=أفزعت ليلي و الجفـا مـا فزعتـه
وش ذنب خفاقي ليا جالـه المـوت=و الناس ما تـدري بحـب طبعتـه
بين المحانـي و المعاليـق تابـوت=يضـم حـي بالـمـوده ورعـتـه
مبطي و حبه بين الأظلاع منحـوت=لو هبت رياح الهجـر مـا أقتلعتـه
أسمه نقشته ماس لولـو و ياقـوت=شريتـه بعمـري و لا يـوم بعتـه
كنه معي من وين ما رحت مفلـوت=رقي المحال لسـود عينـه طلعتـه
أوحيه بين الناس و أبكي على فوت=لو هي دقيقه عشتهـا مـا سمعتـه
ممشاي لأجله يا يا بشر ما هو بفوت=طلق القـدم لمقابلـه مـا وضعتـه
حبه هناي و بسمته يا عرب قـوت=لا ضاق صدري في عيونه وسعتـه
أغليه لو صده على الروح منعـوت=صافي غلاه مـن الضمايـر نبعتـه
حكيه حلاته و الحـلا فيـه مكتـوت=من رقته لـو بسـت خـده وجعتـه
مالوم حظي كان ما هـوب مبخـوت=بصبر و حبه لا حشى ما أنتزعتـه
اللي كذا ملـزوم أحبـه و بسكـوت=يفعـل بقلبـي مـا بدالـه و طعتـه
ما همني هرج العذل فيـه مبغـوت=هذا حصادي وحدي اللـي زرعتـه

[ابو خلود]

يا كُثر ما تخطي و يا كُثر ما أدمحت=و يا قٌل عرفي للجفا عنـد عرفـك
غضّيت عن جرحك لقلبي و سامحت=و أرخيتلك غصن الغلا عند طرفـك
جيتك على سلم المحبّه و لا رحـت=أخفيتك بروحي و ممنـوع صرفـك
توجّتك بتـاج المحبّـه و وشّحـت=أغلى الأماني طوع يدّك و غرفـك
و اليوم مثل الدمع من ناظري طحت=ما عاد لك ذاك الغلا يـوم أعرفـك
هدمك طبعك في خفوقي و لو نحـت=ما ردّني بعيونـي السـود ذرفـك
أقنعت قلبي عن مودّتك و أرتحـت=سرّحت حبك و أنتحر صوت حرفك
أمسك محيته من خيالي و صافحـت=يوم ٍ بعدبي عن مشاويـر جُرفـك
أمسيت غالي في عيوني و أصبحت=ليل ٍ مقفّي بيـن ظرفـي و ظرفـك

[ابو خلود]

يا زيـن مـا ترحـم حبيـب ٍ يـودّك=ذاق المراره في حياته و هـو حـي ّ
أجهش عيونـه بالبكـاء عنـد حـدك=يتبع طيوفك وأنت مبعد ورى المـي ّ
أدعيـه ربٍ خالقـك لــي يــردك=ياللّي بدونك دنيتـي مـا بهـا شـي ّ
ما جيتـك إلاّ مطلبـي صـار عنـدك=و لا ودّي أرجع و الحشا داخله كـي ّ
خذني و لـو دفـاي بيكـون بـردك=خذني و لو تاخذنـي شـوي شـوي ّ
عالج جروحي و إنزّع همـوم بعـدك=و رد البصر لعيون ما حولهـا ضـي ّ
أبحرت بك ما بيـن جـزرك و مـدّك=ياللّي ما بين الناس مـا شفتلـك زي ّ
بإسم الغـرام اللّـي تظلـل ّ بوجـدك=و صوت الخفوق اللّي شكى حالتي بي ّ
وش ذنبنا و الوصل ضدّي و ضـدّك=و الشـوق نـاره بالمعاليـق تغلـي ّ
لا تجعـل الأعـذار تحيـا بـسـدك=مـا للهوى عـذر ٍ يخليـك تجلـي ّ
سافر بروحي و أطلـق عنـان لـدّك=و سج القدم لبـلاد تبنـى لكـم فـي ّ
تتبـع عيونـك لـو تقويـت جهـدك=تتوهبـك طـول المسافـه و تبلـي ّ
إقنع ترى بالحب مـا يمـوت مجـدك=مجـد ٍ بينتـه بالشـرف مـا يذلّـي ّ
و إن جتلك الدنيـا علـى راح يـدّك=دون الوفاء يا زين ما هـي بتوفـي ّ
أعيش وحدي و إنته تعيـش وحـدّك=محروم منّـك و المعاليـق تضمـي ّ
عجلّ تـرى للمـوت أقبلـت بعـدك=ما عاد لـي بالكـون شـيء ٍ يسلّـي
أبنتظـر يـا زيـن يلفـي مــردّك=عسى تـرد و شمسـك تبـدل بفـي ّ
أرجع و خلك مـن عنـادك و صـدّك=أرجع و شفني منتّظر رجعتـك لـي

[خاطري لاتجرحونه]

تسلم الأيادي على جمال الطرح وبارك الله فيك
ننتظر جديدك وفيض قلمك
دمت بحفظ الله ورعايته