ديوان الشاعر : جلال القصيري المزيني

[ابو خلود]

بسم الله الرحمن الرحيم

هذي القصيده لها سالفه مضحكه وغريبه بنفس الوقت ،،،، كنت أدوام بالخفجي وكنت رافع نقل لمدينة الرياض له سنه و ست شهور،، طبعا كنت ما أتوقع أنه يجي نقلي ألابعد اربع سنين أو اكثر ،،، ولكن بفضل الله جاء نقلي وعند تسيلمي للعهده ،،، ثارت طلقه من مسدسي بالمركز بغير قصد ،، وتم إلغاء نقلي ،، وداومت شهرين بالخفجي وبعدها جاء النقل ،،، وكانوا زملائي ينادوني بالمقرووود،،، وكتبت هذي القصيده بهالموقف ،،،






لابوك يالحظ الردي ويش أسميك=أسم يليـق بمنصبـك مـا لقيتـه
أزريت ثم أزريت خاب الرجا فيك=ماعمرها جتنـي علـى مابغيتـه
مديت لك يمناي قصدي أهاديـك=الخير منك يالشقـا مـا أحتريتـه
لاتحسبني يـوم مديـت شآريـك=أكيد شاريني وأنـا مـا شريتـه
لو هو بكيفي كان مبطي مخليـك=حي الفقر عندك ويازيـن صيتـه
لو أنت رجآل وأشوفـك ولاقيـك=يمدي من الغبنه قصاصي قريتـه
قلبي سكن وهموم تسكن مبانيـك=وإليا تبين رآس هـم ن وطيتـه
جاملت لين الرجل ملت مماشيـك=من قرد حظي لون دمعي نسيتـه
اتجيبها مع ذي تنصاك مع ذيـك=وإليا فرشت افراش ونسي طويته
بذكرك في داهيه مـن دواهيـك=من الجراب اللي بفعلـك مليتـه
سنه وست شهور ياحظ وش فيك=جلست بالخفجي وأنا ما اشتهيتـه
جاني قرار النقل ثم قلت أهنيـك=وأترك وأترك كـل علـم جنيتـه
وأثرك تقول بصوت عالي أنا أبيك=فزع معاك مسدسي ثـم رميتـه
وجبت المطمه يوم قلت رجاويـك=وكنسل قرار ليتنـي مـا قريتـه
قلت وفعلت بفعـل والله يجازيـك=ودورت لك أسم يليـق وشريتـه
أنت اللذي وأن كان شانت دعاويك=أجيك في راسي على ما اشتهيتـه
خاويتني وأنت الخوي مانخليـك=عشـاك دسـم ولانعشيـك ميتـه

[ابو خلود]

طلال بعض الهرج لو صار بـه لعـب=بعـض الأودام هرجهـا مـا حسبتـه
مافيـه علـه كـود يلقـى لهـا طـب=طب الجهل أحسـن ليـا مـن تركتـه
لاجات من غالي ومن واحـد ن ذرب=غالي على اسمه كـل شـي ن قبلتـه
شاعر وأشد البيـت و أركـب الطنـب=وإليا تهيى لي مضـرب لـي ضربتـه
ولا عد نفسي شاعـر بالمـلا غصـب=لكـن بحـر الشعـر بالفعـل غصتـه
وأروي ضمى هاجوس شعري ولا أتعب=مواقـف الميـدان صلـتـه وجلـتـه
جبت الجزيله وأتـرك الثانيـه جنـب=مـن عزتـي بيـت الهزالـه مسحتـه
لاقلتهـا مـا فيـه أحـد ن يـعـذرب=تقطـف مـن النـوار أحلـى ثمرتـه
لاطبـت الميـدان تحسـن وتعـجـب=واللـي حسدهـا بالمواقـف قهـرتـه
واللي يدور مـن وراهـا علـى درب=مافيـه درب ن مـن وراهـا فتحتـه
اضرب مثل موجود وأيضـا مجـرب=البـن يطلـع طيـب ن لا حمسـتـه
واللي اليا قفيـت مـا فاتـه القصـب=مـن ألتفـت يمـه تكسـر ارقبـتـه
و أن عادها عوده على الزيف النصب=مارحـت أوجـه بالصواريـخ جهتـه
هرج ن ماهو بالوجه مبني على الكذب=تنقص رجلـي كـان رجلـي طردتـه
جربا ونخشى طردها يكسـب الجـرب=أبعد تفوز بحرب وأنتـه مـا خضتـه
طرده جهالـه تركتـه كنهـا ضـرب=وليـا سفهتـه مـن حميـم ن أذقتـه
وآثق بنفسي مـا تنحيـت مـا أغلـب=فـي ماقفـي ثابـت ولا علـم خفتـه
عمرك سمعت أن البحر يلحقـه كـرب=كـل البواخـر ماتـحـرك شعـرتـه
أنتـه قريـت البيـت مايلحقـك ذنـب=كل ن كتب بيته علـى حسـب لغتـه
طلال لو العلـم بالطـرح والضـرب=أبخـص خويـي زيـن لـو ماطلبتـه
خابر يمينـك فعلهـا يجلـب العطـب=شرواك حـر ن فالصعايـب ذخرتـه
أنته خويـي لاغـدت ساعـة النشـب=ترقى الطـوال وكـل طيـب كسبتـه
من ورس شمر تروي السيف الأحـدب=أليـا طنـوا مافيـه شـي ن خِسرتـه
روح شمال وشرق وعود على غـرب=وأن كان بك حيل ن على الكون درتـه
و وجه على حايل وفي وسطهـا طـب=صغيرهـم طيـب مـن أمـه ولدتـه
طيب ن ورثه ورث ماجابتـه كسـب=من حاتم الطائـي إلـى اليـوم صنتـه
قلته وأنا من روس قومي بنـي حـرب=حرابـة الأتـراك وقـت ن خبـرتـه
زبـن الدخيـل إليـا لفانـا نـرحـب=أفعالنـا دون الخـوي مـن جهلـتـه
لاثارت البيـداء وفـي راسهـا شـب=والسيف يلعب والفـرس مـن صهلتـه
كـل ن شـرب منيتـه قبلهـا شـرب=عدونـا مــن عقبـهـا ياحسـرتـه
وكل القبايـل تـادر الطيـب وتحـب=واللي كسب لـه حاجـة مـن عملتـه
جتك القصيـده ماتبـي شـي يعـرب=إعرابهـا فــي بطنـهـا ماكتمـتـه

[ابو خلود]

لي قصة ن بالحب قصه جميلـه=متعلقه بيـن الوفـاء والخيانـه
فيها غموض ن مايحصل مثيلـه=غموض تعجز ماتهـزز كيانـه
عجزت أفسرها ونفسـي عليلـه=والصبر ضاق ولالقى أي خانـه
قصص تجيني بين جيل ن وجيله=مما رأى بالعين ينطـق لسانـه
دار الزمن واللي تجيلـه تزيلـه=لكن قصة عاشقـي بالحصانـه
حاولت أقرب منه بايـة وسيلـه=والشوق يعصاني وأزيد المتانـه
خلي عليه الشوق في كـل ليلـه=شوق ن عليه القلب يشهد عيانه
مره يجيني شوق مـره أجيلـه=الحب مالـه بالمذاهـب ديانـه
من كثر ما أحبه حسدت المخيله=عشانها تمطـر عليـه بمكانـه
حبه جـرى بالقلـب وأعزتيلـه=حب ن تحفظ به بقلبي وصانـه
مني وفاء يازيـن والله وكيلـه=أموت كان أني نويـت أنسيانـه
هو يحسب أنه لاصفالي بشيلـه=وأعطيه زود ن بالهجر واللعانه
ماتدري أنه كل برق ن نخيلـه=أقول هـذي بسمتـك ياجنانـه
قبل ما انام القلب أسمع وصيلـه=كنه يقول بصـوت أدع لروانـه
أنا أدري انه خايف من حصيله=في وسط قلبه أخذن لـي ميانـه
الحب باين فـي عيونـه دليلـه=لكن خوفه منحصر فـي زمانـه
طيبك عليـه مايحصـل بديلـه=لو كان ماشفتـه أحـس بليانـه
من زود طيبه بالنجوم المحيلـه=تستاذنـه قـدام ترحـل أمانـه

[ابو خلود]

آلبارحه ضآقت عليه بــدنـــيــــــاي=ضاقت علي الأرض لوهي وسيعه

وسجيت رجلي مبعدن كــل هـقواي=حيث أن سج الرجل فيه النفيعـــــه

وأخذت لي فرشه وعزبه ومركاي=من هم قام القلب يشكي صنـــــــيـعه

قفلت جوالي وتــــوسدت يمـــــناي=حت أن يحصل للهموم اتهــجـــيعه

ومديت يمنايه على وســـط مخباي=وأخذت لي سبحه وجــــبت البديعـه

من حاجة ن قام يتلعثم بها حشاي=في داخلي شي ن لساني يذيــــعـــــه

قعدت أشوف الناس والرايح الجاي=أحوالهم ماهي سوى بالطـــبـــيعــه

جلست بالخفجي على غير مشهـاي=وعجزت أقيم صيفها من ربـــــيعــه

جيت البحر يوم أن هـــمـــي تـبلاي=شكيت قال الهم غصب ن تــــطيعه

مره أقول الهم سبـــــة ســـوايـــاي=ومرات أقول الهم عندي وديـــــعه

تعرفـــني أركاني وتذكر زوايــــــاي=كــــم ليلة ن مرت عليه جـــــزيعه

أكذب على نفسي وأنا عارف ن داي=وأصبر وأعرف أن الليالي لكيــــعه

دنــــيــــا دنــــيــه ماتلين لشكــــواي=ماريحت بالناس سنه وشــــيــعـــه

والله لــــو يــــنــفع على الهم بكواي=أن تصبح الدمعه بعيني سريـــعــه

لكـــــن أنـــــا داري عـــلى كل بلواي=سنة حياه مطابقة للــــشـــريــعه

[ابو خلود]

جعل السحاب اللي من الصدر منشاه=يـسـوقـه الـمـولـى عـلــى دآر خـلــي
يسيـل ليـن يضيـق واديــه فــي مــاه=تـبـرق وتـرعـد والـمـطـر يسفـهـلـي
لاصـار سيلـه مصطفـق مـع زوايـاه=كـنـه يـوصــل للـغـضـي ماحـصـلـي
من شـان لمطـر ديرتـه والحيـا جـاه=نـجـيـه كـشـاتـه وهـــو فـاطــن لـــي
حفظـت أنـا مـن عقـب غيبتـه ويـلاه=والسيـل همـي والحشـا وادي ن لــي
خـل ن عليـه القـلـب شــدت مطـايـاه=هـلـيــت ولـغـيــر زولــــه مـاهــلــي
عجـزت بيـن النـاس مالقـى حـلايـاه=زولــه بعيـنـي دايـــم مـصــور لـــي
مـــده تـركـنــي بـالـغـثـا والـمـعـانـاه=يطري على ذكـره ليـا جيـت أصلـي
وجـدي علـى شـوفـه وجــدي بلقـيـاه=وجــد الـغـريـب بـديـرتـن ماتـسـلـي

[ابو خلود]

قم يانديبي فوق الأطلق من الجيـب=موتر على المشـوار نفسـه مغلـه
صحيح بأن الجيب راع المراقيـب=لكن دربي عارف ن مـن يصلـه
من وارد الألمان صنعن بلى عيـب=علامته في وسـط خشمـه مضلـه
علامتـه عـد الثـلاث المكاليـب=أنته و أنـا والخـط واللغـز حلـه
مصمم ن تصميم مبني على الطيب=أليـا نشـف شكمـان حلقـه يبلـه
في دآخله تلقى العجب والتعجايـب=من غير جلد خصص ملبـس لـه
شاشـه وطبلونـه وأزره بترتيـب=ثامـن عجايـب فوقهـا قـدرة الله
بين المواتـر كنـه يقـول أيهيـب=شيخ تعزوى وأبرق السيـف سلـه
وإليا مشى كنـه يشبهـك بالذيـب=ذيـب ن توجـه للجبـال المطلـه
بدل الكفر تصبح بخطـه مخاليـب=من خوف لايقلـع تسابقـت ضلـه
وإليا كبس نوره سوات المشاهيـب=كل المواتـر تبتعـد عـن محلـه
أضيع مادري ويش أخلي وش أجيب=بـس الوكـاد أنـه فخامـه وفلـه
راعيه مره مالحق رأسـه الشيـب=لأنـه أليـا منـه بغـى درب تلـه
هو منوة اللي عجزتـه المطاليـب=اللي حـداه البعـد مـن دون خلـه
كنه يقول أبشـر علـي المواجيـب=ماتمسـي الليلـه بخاطـرك علـه
هو منوتي لامن حدتنـا اللواهيـب=ماغير أشـوف لـه عسـاه ولعلـه
رآح وتركني دون علـم ومكاتيـب=كـذا مـن الله دون سبـه وزلــه
الشوق ينزف مايبي ضمد تطبيـب=والوقت وآقـف ضدنـا يامشـا الله
حبه سكن بين الضلوع المحاديـب=في مستوى ماظني أحـد ن وصلـه
أرسلت له من شآن حبـه مناديـب=مشمـع بعنـوآن يــم الأخـلـه
وأخذتها حطيتهـا دآخـل الجيـب=مـادري قريـت الخـط وإلاتملـه
لكن خذهـا كلمـة مابهـا طيـب=رأسـي ماضريتـه حيـاة المذلـه
أما تعال نعيش من جرحك نطيـب=أعطيك من قلبـي وتعطيـن كلـه
وإلا على ماقال شاعر وأنا اصيـب=شد الرحـال ودرب عمـك تدلـه

[ابو خلود]

ياقمـر بيـن الديـار أخـذت دوره=بسألك بالله جـاوب عـن سؤالـي
الحبيب اللي تأخـر فـي حضـوره=وين غايب ليه يقطع فـي وصالـي
ياقمر بوصفـه وأعطيـك صـوره=وأنت دور له وقلـه ويـن سالـي
لا لقيته عطـه علمـي للضـروره=وعلمه جلال عقبـه فـي ضلالـي
ياقمر بالوجه نـورك مثـل نـوره=زآيـده ربـي بأوصـاف الكمالـي
ياقمر عينـه جميلـه فيـه حـوره=والرموش كثـآف يلحقهـا الميالـي
الجسم لامن مشى يخشـى غـروره=مشيته تفرض على الناس الزوالـي
لازعل بالوجه كنـه فـي سـروره=لارضى يطغى على الوجه الدلالـي
كل عرق ن فيه يبطي في مـروره=ناعـم ن زود النعومـه مايبـالـي
خطوته بالأرض بين الناس ثـوره=ثـورة ن ماقادهـا قـرم الرجالـي
أسودُ العينيـن أكمـل فـي وقـوره=مـارأت عينـي مثلـه بالجمالـي
هو هدم قلبي وهـو سبـة عمـوره=هو كلي....وأنـا كله....عزتالـي
طيروا العذال مـن قلبـه طيـوره=من شهر شهرين مادري وش جرالي
لاكسبته كل شي ن تحـت شـوره=مرخص ن من شان عينه كل غالي

[ابو خلود]

عسى الفتـاة اللـي لقتنـي هالايـام=يصيبهـا ماصابنـي فــي لقـاهـا
ليه ثـلاث ايـام والجفـن مـا نـام=الظاهر انـه صـاب قلبـي غلاهـا
اليوم عندي صاير (ن) حسبة العـام=رحلـة نهايتهـا قـبـل مبتـداهـا
مغرم ..متيم.. تايـه الفكـر مايـلام=حـال الشقـاوي بيـح الله خفـاهـا
بالمختصر ( حالي على غير مايرام )=دام الهـوى والبعـد حالـي طواهـا
والله لو ماكنت فـي لبـس الاحـرام=ماصـد عنهـا وأتجاهـل نـداهـا
مارحـت ادور للمشاكـل والاوهـام=لكـن صدفـه شفتهـا لـي تبـاهـا
موكب جمال .. قدمه جيوش وأعـلام=وحوله حرس يستيسر اللـي يراهـا
فتنه علـى وجـه البسيطـة للانـام=الله عطاها مـن الجمـال وكساهـا
زمردة مـدري مـن اللولـو الخـام=او درة مكنونـة(ن) فـي خبـاهـا
من حقها تفرش لها الارض برخـام=حـق عـلـى وليـهـا لا ولاهــا
واليا بغـت حاجـة يقولـون قـدام=وتنفيـذ اوامرهـا حسـب مبتغاهـا
بغيـت أواصفهـا وجفـن الاقــلام=الله يخليهـا لقـلـب(ن) رجـاهـا



الشاعر : محمد الحنتمي






وهذه مجارات الشاعر : جلال المزيني

بحر الشعر يوم القلم داخلـه عـام=كتب قصيـده للغضـي محتواهـا
سبحت في حبه واالا الموج لطـامأ=زريت أجاري درتي فـي هواهـا
الزين عنده مالكـه ملـك بحكـام=حكم الشيوخ اللي حمانـا ذراهـا
أبوعيون وساع فـي خدتـه شـام=وأبوجديل لا انثنـى مـن وراهـا
الجسم كنه ناحـل العـود منضـام=وإليا مشت ضآع الأمر في خطاها
وإليا التفت يمي تواريـخ وأرقـآم=صعبن على قلبـي يعـدد حلاهـا
الطير لامنـه علـى جوهـا حـام=وقع على غصن الشجر من رضاها
والأرض لاسمعت مواطي بالأقـدامخافت عليه الشوك يظهـر دماهـا
النجم لامنه ظهر وقـت الأضـلام=خلى سماه وجـاء يـدور سماهـا
لو زارني بالنوم في وضع الأحلام=عيني تمنى النـوم يمكـن تراهـا
لوهي على البصمه بصمنا بالأبهام=عشر الأصابع كلهـا مـن فداهـا
نشدت عنه الناس والقلـب منهـام=وأنا العليل اللـي بحاجـة دواهـا
ياشوق واحد من سبايبك مـا قـام=أبطـى عليـل وعلتـه ماشكاهـا
ياظنتي مايلحقـه عـرق بالشـام=ولابالخليج ولاسكـن فـي قراهـا
درة ماراحت بين شـاري وسـوام=مكنوزة ماحـد ن لمسهـا وجاهـا
أن وصلتك بيوت شعري بالإعـلام=أشفق على روح ن سكنت بحشاها
وأن راحت بيوتي مكاتيب وأفـلام=قصه رواهـا واحـد ن ماشراهـا
تراك مسموح ن على كـل الاثـام=نفسي وأنا اللي حاكم فـي شقاهـا

[ابو خلود]

ليت القمر بالأرض ينزل وأنا ارقى=وأشوف خلي وسط داره وأحاكيـه
دورت بالعالـم شبيهـه ولا القـى=حتى القمر يوم أن نزل صار يغليه
زلقت في حبه وهي شـر زلقـى=رمى وصاد القلب وثـق عروايـه
وجهت غرب وثم تنحيت شرقـى=وعيني تهل الدمع والقلـب يبكيـه
أسـج عنـك ولاتشوفـت برقـى=تطري عليه ياعنى الروح ياهيـه
حديتني صرت أمشي الليل طرقى=وقلبي يجيب أسمك وروحي تغنيـه
أقسم برب ن فالـق الحـب فلقـى=حبك بقلبي يالغـلا محتفـظ فيـه
كتمت حبك مـادرى عنـه خلقـى=ياخوف عذالي من السـم تعطيـه
أضحك وأسولف والأحاسيس علقى=وقلبي بيدينك وأنـت ودك تذكيـه
دموع عيني ياهوى البـال غرقـى=وحبال صوتي بايحه يـوم أناديـه
ناحت على ذيك المطاليـع ورقـى=كنها تقول بصوت..جلال توحيـه
وأصد بين الناس والروح حرقـى=وأضحك مٍجامل وأنت قلبي تكويـه
ياليت قلبك ماخـذه منـك سرقـى=لتشوف بعيونك وش اللي تسويـه
لوقلت لك فرقى..تبى تقول فرقـى=ياقو قلبـك نعنبـو حـي راعيـه

[جلال خلف القصيري]

ياوجودي وجد من ضامـه زمانـه=شايل ن همه وهـم عيـال أخـوه
هم ثلاثه واحـد ن شلـت اركانـه=والصغير سنه الشهرين مابعد افطموه
شايبه عمـره كبيـر ن واهذيانـه=قومه من عز نومـه صـوت أبـوه
لاتذكـر اولــده حــزة دفـانـه=صاح باسمه ثم نـادى مـا ادفنـوه
وأمه اللي طايحـه تبكـي عشانـه=بـس تشـر فـي يديهـا ماتـفـوه
لاسمعت طاري ولدها مـن لسانـه=طاحـت الدمعـه وتشـر نـومـوه
وأن بغت شي ن لها ماتقول عانـه=قـام يديهـا تحـرك ثـم يـتـوه
ماشرب هيـل الحيـاه وزعفرانـه=ولاتهنـى فـي شبـابـه كلـبـوه
الليالـي توجعـه تـهـدم كيـانـه=لابنى لـه حلـم يهـدم فـي نمـوه
شاب راسه قبل شيبـه فـي اوانـه=والهمـوم بداخلـه قصـرا بـنـوه
الشجاعه فيه بـس الوقـت خانـه=والزمـن غـدار يقهـر نعنـبـوه
لـه عيـال العـم كـل ن بلهيانـه=مايمـرونـه ولا بـعـد انـشـدوه
اظهـروا لـه بالعـدواه واللعـانـه=ولاوقف عطـلان يشـر مانصـوه
لاوظيفهـا يعتمدهـا مـن ضمانـه=بعد أخوه اللي سهوم المـوت جـوه
شغلتـه كـداد ويـذوق الاهـانـه=ذاق مـر الويـل ماقـد قـال يـوه
موتره باليـوم يبغـى لـه صيانـه=وأن وقف جيـران بيتـه صلحـوه
يوم الأثنين الصباح أطلـق عنانـه=دق سلـف لموتـر ثـم صبـحـوه
أربعه كـل ن ولـه منهـم ديانـه=قالـوا أوصلنـا مكانـا وأنعـتـوه
يوم حرك من مكانـه فـي مكانـه=جاه طايـش ثـم شالـه واسعفـوه
وأقروا التقرير وألقـوا فـي بيانـه=أنـه المذكـور مخطـي حاسبـوه
ماتـوا الركـاب والديـه أمـانـه=حيث يطلـع بالسلامـه واسجنـوه
ياعظـم بلـواه ياسـبـة جنـانـه=والجماعـه يـدري أنهـم مانفعـوه
خابر أنه بالسجن مبطـي سجانـه=إلا أن كـان الطلايـب سامـحـوه
هو أبوه اللي طريح ن فـي وهانـه=وإلا هاليتمـان وأمــه يحـتـروه
وأمه اللي تلتفـت فـي كـل حانـه=كل يـوم أتصيـح للبـاب أفتحـوه
والولد بالسجـن يـوم الهـم شانـه=بالسجن ماغير صوته هـوه هـوه
من هموم داخـل الجـوف بتكانـه=جيت أجمعها وأنـا لحالـي وأتـوه
كلهـا مـن هـم زايـد بطغيـانـه=كـل ماجيـت اتنـاسـى نبـشـوه
هم يهـدم هـم يبنـي لـه وزانـه=والفـرح فـي دنيتـي ماسكَـنـوه
مالنا غيـر الولـي نرجـي جنانـه=والأوادم يــم عـفـوه يطلـبـوه

[جلال خلف القصيري]

يازين ياللي نظرتـك كلهـا شـي=اترجع الإحسـاس منـي و فينـي
مدخلك بالله يانظر عينـي شـوي=دام الأمر بيديـك ماهـو بيدينـي
العين يم العين ثـم ترجمـة لـي=عرفت مبداء باللغه وسـط عينـي
من عادتي لي كلمة ن مابها أثنـي=لـي كلمـة ن لا قلتهـا ماتلينـي
لكـن عينـي وقتهـا خالفـت ذي=بين العيون يصير هرج ن رزيني
كن العيون اتقول وش فيك وش في=تناشـد الأحـوال بينـه وبيـنـي
سويت مابي شي جمعت هرجـي=وشلون أببداء دآم وقتـي ثمينـي
قلت أيه أسلم بعدها أنشـده هـي=كيـف القرايـب كلهـم طيبينـي
سلمت..ردت صوتها يشبه الـري=يروي ضمى قلب ن ضمته السنيني
ثـم قلت..قالـت بـس والله ودي=بس الجماعـه يالغـلا خاطبينـي
وأرجوك أنسى ماحصل بينا شـي=أنسى وأنا بنسـى بقايـا حنينـي
عيني وخانتني وهلت مـن المـي=قاعدت أجامـل دمعتـي لاتبينـي
وشلون أبنسى ياهوى البال و أنتي=عمري وقلبـي أمنياتـي ونينـي
قلت ابحاول يمكن الجرح يشفـي=بس شرط مري هالمحل واعدينـي
أصبحت أنا ميت ولو شفتني حـي=حي ن ولي قلب ن شبع طاعنيني
أتلى العهد فيهـا تسلـم وتمشـي=يابعد يدهـا مـا تلامـس يدينـي
راحت وانا وقف عجزت بتمشـي=وشلون غابت نجمتـك ياعوينـي
بالحايلي كنت أعتبرها بعـد حـي=وفي خاطري هي ثالثـة والدينـي
مليت من شمس القهر تصبح الفي=وأخاف من برد الزمن تحتوينـي
راحت وانا واقف تثاقلـت رجلـي=لحظـة مـوادع نعنبوهـا تبينـي




وسلامتكم ,,,,

[جلال خلف القصيري]

الشوك قصدي شوق يطغـي عليـه=لاوالله إلا الشوك أرحم من الشـوق
ألعن أبـوه اشلـون سـوى كذيـه=خلى المولع من عنا البعد محـروق
يالأدمـي يضحـكْ شـر البلـيـه=يبكيك خل ن ما معه بالهـوى ذوق
كم ليلـة ن دقيـت أنـا الهاشميـه=وكم نهارن راح والعمـر مسـروق
أسبـاب والأسبـاب ماهـي خفيـه=يجاوبك وجهي ودمعي مـن المـوق
بسباب خـل ن راح وأقفـى مسيـه=وجاني يوادعني وأنا تقـل مطفـوق
قال الوداع وقلـت روحـي شقيـه=قال الزمن قلت الزمن عادته بـوق
نار الفراق بداخـل الجـوف حيـه=والقلـب كنـه بالمعاليـق مشنـوق
اللـي حـلاه يفـوق كـل البريـه=لو قلت لي يعني هنا..قلت لك فـوق
الحـب حسنـه والمقاديـر سـيـه=والوصل والهجران بيديـن مخلـوق
أمـا يخلـي لـي حيـاة(ن) هنيـه=وإلا يروح وكل مطـرود ملحـوق
الشـوف عالـج علـة ن داخليـه=والصد جرح ن ماله اعلاج واحقوق
والإبتسـامـه كنـهـا شـاذلـيـه=خلـه يقهوينـي فناجيـل معشـوق
والعشـق كنـه ياجماعـه مطـيـه=واللي تجود بالرسن عاش مرمـوق
واللي يطيح ولا كتـب لـه وصيـه=مثل الكتاب اللي مع النص مشقـوق
لا هو ب مـع خلـه حياتـه بريـه=شارد بفكره يضرب خطوط واعروق
في ذمتـي ذمـه بالأحـوال زيـه=الحـن المـوال وأبـدع بطـاروق

وسلامتكم....

[جلال خلف القصيري]

الحب جرح ن دآخل الجوف ماطاب=والجرح ينزف والغضـي مادرابـه
والسم يجري ماهو بسـم مـن دآب=سم الفراق اللـي شنيـع ن شرابـه
والهجر عله والدواء عند الأحبـاب=وعزي لمن سهم المقاديـر صابـه
واللي أنجرح من حبها بعدها تـآب=حبـه هشـاش ولايبيـن صوابـه
مايدري أني جالس بين الأصحـاب=أضحك وأسولف والدعابـه دعابـه
سريت بالذكرى على ذيك الأهـداب=أغيـب وأصحـى وألتـذذ عذابـه
الحب أحبه حب ما ياسـع اكتـاب=غطى على كـل الأهـل والقرابـه
مفروض من يهجر حبيبه بلى أسباب=يحكم عليه الشيـخ حـد الحرابـه

[جلال خلف القصيري]

رفيقي اللـي بالمواقيـف مـا القـاه=ماهو رفيق ن لي ولا انـي رفيقـه
والله ما أبغى ياعـرب كـود فرقـاه=وأن راح والله ما أتبعه في طريقـه
أن كان ما يفزع ولا أشوف فزعـاه=السيف ماهـي بـس لمعـة بريقـه
والله ما أذخر عن رفيقي ولا أضماه=ولا بـل ريقـي ليـن يبتـل ريقـه
وأسفط له الطيـب وابـدور رضـاه=ولا جات بالشده فانـا مـن فريقـه
االلي ليا شفـت الغرابيـل تنصـاه=أزيحهـا ياخـوف يمكـن تعيـقـه
وأدمح له الزله على حسب مخطـاه=ولا حمله شـي ن مايقـدر يطيقـه
اللي ليـا جتنـي همومـي مجـلاه=يشيلهـا لـو كـان شبـت حريقـه
أما رفيق الوقت والضحك ما ابغـاه=الضحك مـا فـك الهمـوم العميقـه
يلقى مثل شـرواه نـاس ن تحـلاه=وتحط له صـوره وبصمـه عميقـه
وتعطيه شي ن فـوق حقـه ومبـداه=أيضا ن ويعطـى بالمواقـف وثيقـه
مايـدري أن العمـر لا بـد منهـاه=عسر بسيط اتشـوف كـل الحقيقـه
يا بوعوض ياطيـب العـز والجـاه=ياللـي افعـال بالمواقـف طليـقـه
أبـسـئـلــك بالله....بالله....بالله=أو حط نفسـك فـي مكانـي دقيقـه
البير تعرف مويته مـن طعـم مـاه=والطيب له نـاس ن تبيـه وتليقـه
شفت الردي جعـل المقاديـر تنعـاه=اللـي بحـزات المـواقـف .....؟
أجر صوتـي لـه ولاكنـه أوحـاه=غني ...لكـن بـاب هـذا صديقـه
أجلـس لحالـي بالخـلا دون لقيـاه=أخير من شـوف الوجيـه العميقـه
حيـاة عـز... ولا حيـاة المعانـاه=عيني على شـرواه ماهـي غريقـه
كل ن على طيبه على فعـل يمنـاه=ترحـل وتبقـى سمعتـك بالخليقـه
يابوعوض البيـت واضـح بمعنـاه=واضـح مايبغـى للوجيـه تعليقـه
خطو العرب.. تُعرف أساس المخاواه=رفيقك اللي بضيقتـك جتـه ضيقـه

[جلال خلف القصيري]

البارحه عينـي عـن النـوم جاهـا=شـي ن منعهـا ياولـد لـذة النـوم
والنفـس عافـت عيشـة ماتبـاهـا=وأمسيت ليلي يابن الاجـواد محـروم
دنيا تـدور وتخفـي اللـي وراهـا=تقلبـت مابيـن شـاري ومسـيـوم
ترى الليالـي يابـن مفلـح عناهـا=تركي على قلبي مطاريـق و وسـوم
ناس ن تقوم الصبح تعـرف رجاهـا=وناس ن تقوم ولابعـد كنهـا اتقـوم
وناس تقـوم الصبـح ربـك عفاهـا=وناس ن على قضي الأجل جاه محتوم
دنيـاك عشهـا بالرغـد والنـزاهـا=فـي ذمتـي مايلحقـك بعدهـا لـوم
ترى الزمـن حلـو الليالـي طواهـا=والأمـس والله مايجـي مثلـه اليـوم
مـن عـز نفسـه بالمراجـل لقاهـا=ومن ذلها راحـت حياتـه كماالبـوم
الخبـل همـه كرشتـه لا مـلاهـا=بين النشاما صايـر ن تقـل منجـوم
أضرب مثل موجود عـل وعساهـا=أن الليالـي ماتجـي دايـم ن تـوم

[جلال خلف القصيري]

يالأذن لو أنك سمعتي من الهـرج=خليـه يمشـي لايديـر إهمامـك
نقالة الهرجه مـع أكالـة الحـرج=ماطيروا فوق الدرايـش حمامـك
وإليا سمعتي شي حطيـه بالـدرج=الميتـه ماتنتسـب مـع مقـامـك
ممشى العدل ماينتشابه به العـرج=أضرب مثل...نورك يشابه ضلامك
خليه يضرب برحة ن ما بها فـج=ماحرك الشعـر وبعثـر كلامـك
الآدمـي لوصام..لوقام..لـوحـج=فك اللسان يشيـل معضـم أثامـك
سكرت أذانيه عن الصـج واللـج=وفي راحتي شوفي معلق وسامـك
ويانفس همك لو تشدد به السـرج=لابد من يـوم ن يولـي غمامـك
الليل لو سمي بـه الليـل الأدلـج=بكره يباح الشوف شوفي مرامـك
يجي لها من والي العرش مخـرج=رب العباد أدرى بك أنتي علامـك
خلي همومك بالوطا وأرقي البـرج=مادام مابـه يـوم حقـق حلامـك

[جلال خلف القصيري]

هآجسي حضِر بعد طول الغياب=وأكتب بيوتك وحسٌن فنُها
اكتب الفرقا هي أسباب العذاب=ولحٍن ألحان المآسي عنٌها
راح مادري وين روٌح بس غاب=الهموم اللي بصدري حنٌها
انتظرته في رجاء وقتي وخاب=حملته رمز التغلي شنٌها
والعتاب اللي يسمونه عتاب=كلمتين معذره وش كنٌها
بعتبرها قصةٍ وسط الكتاب=دلة الفرقا حمسنا بنٌها
جيت له في قلب صادق مايهاب=لين خسٌرها عليٌ بصٌنها
شآب راسي منه توي بالشباب=نفسي اللي منه خايب ظنهٌا
جيت مع دربٍ نواه ابدون باب=حسب ملة صاحبي لأنٌها
الهجر ضده هجر دون الحساب=والمواصل يشفي اللي منٌها
أثر حبك يالشقي كله سراب=بس لحن في اللحوون وغنٌها
أخذ لك كلمة على مبدا الصحاب=كلمةٍ وإن كنت قآدر ثنٌها
أتكل ياصاحبي رحله ذهاب=دمعة الفرقا قسم ما ادنهٌا

[بندر بن غنام الهويملي]

http://deewan-harb.com/vb/mwaextraedit4/extra/56.gifصح لسانك يا بوووووووووووووو خلف

[خاطري لاتجرحونه]

تسلم الأيادي على جمال الطرح وبارك الله فيك
ننتظر جديدك وفيض قلمك
دمت بحفظ الله ورعايته