ديوان الشاعر : عالي السحاب

[ابو خلود]

لاتسأليني عن سبب كتم الآحزان=بس اسأليني عن غيابي وحضوري
لاتسأليني عن سبب دمع الآعيان=بس أسأليني عن دواعي سروري
لاتسأليني عن تصاريف الأزمــان=ترديدها يرهب ويرعب شعـــــوري
أجامل أحبابي وربعي والأخـــوان=جبر الخواطر صار معنى حضوري
أعطيهم الفرحه وأنا وسط الآحزان=وأجبر كسور الغير وأهمل كسوري
وأحيان أحس إني بقايا لإنسان=وأحيان أحس اني أغيب فحضوري
فجرت أنا في عالم الشعر بركان=لا ماأحترفت الصمت صمتي جهوري
أسرح وأفكر والتفاكير تحـــنان=يوم القوافي تعيش نشوة ظهوري
القلب ميت والمضامين سلــــوان=ألغيت انا في عالم الحــــب دوري
من باعني يابنت لاشك غـــلطان=أظلمت دنياه من عـــــقب نـــوري
مدري ظلمته أو ظلمني هالأنسان=أحترت انا مابين عدلي وجوري
بس الأكيد أنه لعهدي وفى صان=ماأمطر لغيري بس ماأسقى زهوري
علي تجبر وأشعل القلب نـــيـران=وصار التباعد في هوانا ضروري
ماأشره عليه بس أنا حيل شرهان=على سنينٍ ماتقدر شـــــــعوري
انا الجليس وعزة النفس عنــــــوان=وفي عزتي يابنت قمة غــــروري
ولاني على دروب المحبين شفقان=خلي الصدف يابنت تعلن حضوري
بالمختصر يابنت انا فرحة أحزان=أنا الغموض فعالم الصـــمت دوري





أعجبنى الابيات السابقه التى قرأتها فى أحد المنتديات مع أنني لاأعرف من هو شاعرها............ حيث الابيات الرقيقه المشعه بالرومانسيه المفعمه بالحزن
المكتنف بالغموض المغلف بالاباء والتحدى والشموخ....فجاريتها على عجل ...أتمنى أن تروق لكم مجاراتنا مع أطيب أمنياتنا .....



لا تأسألوني ليش بالليل سهران=بس أسألوني ليش أكتب سطوري
لا تسألوني يطرب الشعر لا زان=وليا سألتوا خوذوا الرد فوري
لا تأسألوني جرح الايام ما بان=بس أسألوني كيف تم العبوري
لاهان رأس(ن) يرفض الذل لاهان=عاش بكرامة وأن سكن بالقبوري
والبيت مايبنى على غير عمدان=بيت الشعر يبنى بوسط القصوري
بيت(ن) بلا قفل (ن) وسور(ن) وبيبان=وبيت(ن) كما بنك(ن) بقفل وتجوري
أحد(ن) يموت بداخل النيل عطشان=وأحد(ن) روى من نبع حزن(ن) يفوري
وأحد(ن) يدور سدرة(ن) ما بها أغصان=وأحد(ن) كسى صحراه بورد(ن) وجوري
الحق نور(ن) والحقائق لها شأن=وباب الهوى صكه ليا طعت شوري
أنصحك ياللي تحسب الحب سلوان=الحب جرح(ن) غائر(ن) بالصدوري

[ابو خلود]

غبت .. ورجعت .. وجبت .. لا تسأل شـ جبت ..؟؟
وإن قلت لي " وش جبت " ماني .. بــ قايل ....!!



لكن .. تذكـّـر .. مثل .. ماينبت ... النبت .........!!
حبك نبت في وسط قلبي .... خمايـــــــل .........!!



السبت .. لآمن .. راح .. جاء بعده .. السبت ...!!
بس أنت لآمن رحت مالك .... بدايـــــــل ........!!



ما أقول .. ذبت بـ داخلي .. ( سالفة .. ذبت ) ...!!
صارت قديمة وأنت بــ القلب .... ســـــايل ..........!!



من قال إنك غبت ..؟؟ .. يكذب .. فــــ لا غبت..!!
يـ اللي رصيدك وسط هـ القلب ... هـايــــــــل .......!!



جتني حروفك .. طابت حروفك ... وطبت .......!!
.يــ اللي مع البـــاقين مالك .... مثـــــــايل ..........!!



أبشـّـرك .. دامك نصحتن .. أنا .. تبت .........!!
تايب لـ ربي من ... ( عظيم ... الفعايـــــــل ) ........!!



كبتّ روحي .. عن هوى دنيتي .. كبت .........!!
من فضل ربي ما لـ غيره ... " جمـــايل " ...........!!



شفني شباب .. وأوعدك .. لو أنا .. شبت .....!!
ماأنساك لو شمـّـر نست حبّ .. حايـــل ..........!!



يمكن بـ حرفي .. صبت .. ويمكن .. فـ لا صبت
.لكن أحاول فيك كتب ... الجزايــــــــــل ..........!!



ماهبت غيرك .. بس .. في حضرتك .. هبت ...!!
هبت أكتب حروفي لو الشكّ ... زايـــــل ........!!





قرأت البيوت السابقه وهى على مااظن للشاعر نواف الفهاد وأعجبتني أيما اعجاب لسلاستها وعذوبتها ورقيق مفرداتها ورائع بنائها وجمال حبكها وسبكها ولعلها وافقت شىء ما فى نفسي فلم أستطع أن أقاوم رغبتي بمجاراتها فلقد كانت كالنسيم العليل الذى قلب صفحات الذكرى فتطايرت الاوراق
وتدفقت نسمات الذكرى الرقيقه لتزيح الستار عن مشاعر طواها النسيان
فإليكم أيها الاعزاء ردي ومجاراتي للقصيده السابقه متمنياً أن تعجبكم قصيدة الفهاد ومجاراة عالي السحاب لها.....




قريت قاف(ن) من جماله تعجبت
حبك(ن) وسبك والمشاعر دلايـل



شعر الغزل لو كان منه تهربت
عيني على زين المعاني تخايـل



يمكن مضت أيام لي فيه جربت
لو كان تجربتي بوسطه قلايل



لاشك دربني وأنا فيه دربت
وأخذت حذري من جميع المسايل



وأثره غطاني لين منه تشربت
وفتحت له فى داخل القلب فايل



وأبعدت عن درب المخاطر وجاوبت
وسألت قلبي قلت وش أنت شايل



وصارت أرسومه أبعد من هضبة التبت
وقطعت من دونه كل الوسائل



وأبعدت بالديره وعنه تغربت
عله يزيح الهم حمل وثقايل



ومن باب نصحي ياملا فيه عذربت
لعل يسمع جابتي كل سائل



أبعدت بالنجعه وعنه تغيبت
وحذرت عن دربه رجال الحمايل



وأمنت بالرحمان وكفرت بالجبت
وكل(ن) على دربه يسوق الرحايل

[ابو خلود]

أرسل لي أحد الاصدقاء ثلاث أبيات وربما تكون من منقوله وتفاعلت مع الابيات وهذا يتضح جلياً بالرد الذى أطلقت العنان له وتوقفت عند أثني عشر بيت أتمنى أن تروق الابيات لكم مع أطيب الامنيات


رسالة الصديق


غالي(ن) بالحيل ياسيد الغوالي
بالدقائق نذكرك عشرين مره


نذكرك بالخير لا جالك مجالي
والليالي غيبها يكفيك شره


عن أحوالك قلت بوجه سؤالي
ياعسى الايام لك خير ومسره




ردي عالي السحاب على الابيات السابقه



مرحبا واهلين ياذيب الشمالي
عد قطر الماء ونجوم المجره


يحفظك الله من شر الليالي
يحافظك الله من شر ومضره


مثلكم شيال حمولن الثقالي
لو ثقل الحمل بعزمه يجره


الرجل شيال ضلعان الجبالي
والردي ماشال لو ريش بصره


وش يجيب الضلع للتعس الهيالي
الطعوس تزول والضلع بمقره


العمر زوال والعالم خيالي
والزمن دوار والعالم تفره


الزمن غدار فاق الاحتمالي
قالوا بالأمثال الدنيا مغره


الردي مبسوط يشرب من زلالي
ما لاحاه الوقت ببرده وحره


والشريف ضعيف مانال الظلالي
ما لقى باليوم حتى اللي يمره


يا عجيب الوقت يا وقت الريالي
الغبن يزداد مع همه يكره


يا إلاه الكون عظيم الجلالي
محصي (ن) الخلق فى بحره وبره


يا إلاه الكون منزل الخيالي
ترزق الاجواد عفوك والمسره

[ابو خلود]

هذه من كلماتي القديمه نوع ما ومن أوراقي القديمه أقدمها لكم كأول مساهماتي فى هذا المنتدي .....أرجو أن تنال أستحسان البعض


ياذيب ياللي ترفع الصوت عاوي
ياذيب ياذيب الخلا مااكثر عواك

ياذيب ياللي بالطويله خلاوي
سايلك بالرحمان ياذيب وش جاك

ان كان صيدك جوع مابك بلاوي
واجد حلال الناس وانت فتاك

سرحان مامثلك يهاب الشواوي
ذيب الخلا ياذيب معروف مبداك

وكان انت ياسرحان لعواك هاوي
جرحك كبير وتالي الليل جزاك

وتطرب ليا منك سمعت الصداوي
قام يتردد عالي الصوت ثم جاك

أزعج وأنا معك أشيل الغناوي
ياذيب هاض الجرح الله يبلاك

أستغفر الله ماني ياذيب غاوي
كاتم همومي ولاأرفع الصوت لولاك

لكن بقلبي مثل نار اللضاوي
وهانت ليا مني تجاوبت وياك

ياذيب ياسرحان خذلك مخاوي
همي سراني وأنت الهم سراك

واقلبي اللي بغبت الهم داوي
ترمي به أمواج التعاسه والاهلاك

واقلبي اللي كامل الهم حاوي
اللي زعج بالصوت فى درب الاشواك

وعزاه ياقلب(ن)من الحزن ذاوي
ذويت سجين داخل السجن وأسلاك

نور الفرج ماله بسجنه حراوي
مات الامل ولاله اليوم فكاك

واقلبي اللي حرقت به مكاوي
وعزاه ياللي لاهب النار أدواك

وأدواك صعب ولالقينا المداوي
وش فيك ياقلبي تزايد بعميااك

همي ثقيل ولاني للهم قاوي
وش عاد لو أني مع الناس ضحاك

وين انت يالسباح بحرك رهاوي
أنت عداك اللوم والموج غطاك

أضرب على الكايد لا صرت ناوي
والله كريم(ن) كل مادارت أفلاك

الامر لله والقدر هو سماوي
ياالله ناشد عفوك اليوم ورضاك

ترحم بحال اللي تحول فداوي
اللي بقاله بس سبحه ومسواك

ومن لاتعلم ماتفيد الهقاوي
ومن لايودك نور عينه بفرقاك

تم الجواب لناسجين الحكاوي
دكتور قلب(ن) صاير اليوم سباك

[ابو خلود]

أقدم لكم أخر خواطري وهى جواب لسؤال مكتنف بالغموض ومتشح بالحقائق المتشعبة الأوديه الهائمه والعائمه فى غياهب النفس فى أروقة العرف والتقاليد وعلى بساط الحياه والناس ومن أغوار التاريخ والماضي ..المختفيه خلف ستار الدفن الجريح والتلميح الصريح!!!!!!!




يا اللي سألت أعطيك حسب أجتهادي

ويانشد(ن) عني مالك مهونه




أنا العنيد أن طال حبل العنادي

حلمي وسيع(ن) والعرب يعرفونه




وأنت أستاذ ولايبيلك أستادي

مهما غضبنا المشاعر حنونه



يامل قلب(ن) كل ماقلت هادي


قامت تنقض به خوافي طعونه




لا ضاق بالي وأدلهم السوادي


نسمه من الماضي تحرك غصونه




ليلي طويل طال ليل السهادي


وقيثارة الذكرى سمعنا لحونه




قلب المشاعر ماهو قطعت جمادي


وصف المشاعر يقصر الوصف دونه




أسرجت للمعنى ظهر الجوادي


وترا الجواد بحاجته يسرجونه




أبغى أتذكر ماضي(ن) للشدادي


أقفى زمانه والعرب يتركونه




وقت(ن) مضى للمرهفات الحدادي


علم(ن) وكاد والملا يذكرونه




ماكل سيل(ن) سال سيله بوادي


ولاكل بيت(ن) ثابتاتن أركونه




وطال السهر لمضيع الدرب غادي


قلبه عليهم والملا مايبونه




كنه على ماقيل أحمد نجادي


حاز النجاح بشعب والا بدونه




أحد(ن) زرع وأحد(ن) يلم الحصادي


واللي جنوه من العنا يدركونه




وأقبل سلامي بالحروف الجدادي


وبل السحاب اللي تدفق مزونه




أقبل سلامي ريح ورد(ن) وكادي

ومن حولها أشجار للزيزفونه

[ابو خلود]

أرسل لي أحد الاصدقاء مقطع عن شايب ربما رأه بعضكم ماتت أحد نياقه ..فأنهار من الحزن
وعلا صياحه وفقد اتزانه ولو كان مافقد هو احد ابناءه أو احد أعزاءه ربما لم يفعل ولم يؤثر عليه الموقف لهذه الدرجه ..ولكن لعلمى لتعلق أهل الابل بها وحبهم الجارف لها وولفهم الزايد عن الحد لها فيكون فقدانها بالنسبه لهم كارثه ... دفعنى الموقف للكتابه فكانت هذه الخاطره البسيطه أحببت أن أعرضها لكم عسى أن تنال الرضى والاستحسان....



يا اللي ولفتك ولف راع الاباعر


ماهو على ولفه مكرهه ومجبور




عطني خبر وأعطيك شعر ومشاعر


أقطف أحاسيسي و أزرع لك النور




لأجلك قطعت دروب والدرب واعر


أقطع ظلام الليل لو كان ديجور




قامت مشاعرنا لأجلك تساعر


نار(ن) تلظى لك على حس وشعور




لكم قطفت الورد من قلب شاعر


مشاعري قطفتها قطفت زهور

[ابو خلود]

قصيدتان فى أحد المنتديات شدتا أنتباهي و هما للعتيبي و منصور التويجري ولقد جاريتهما أتمنى
أن تنال الاستحسان والرضى ويرتقى الى الذائقه الشعريه......



قصيدة العتيبى



مابينـي وبينـك مجـالا للإحـراج
إلإ عقـب صكيـت بـاب الميانـه


على كـذا محـدا للآخـر بمحتـاج
رزق البنـادم عنـد ربـي ضمانـه


والهرج كثره مامنه غيـر الازعـاج
ما يقضي الرجـال بالهـرج شانـه


للصـدق منهاجـا وللكـذب هـراج
والكـذب بالرجـال راس الجبـانـه


والضالع اللـي دربهـا دوم منعـاج
تدريجهـا للـي سـواتـي مهـانـه


ماني وكيل آدم علـى كـل هلبـاج
رزقي على من له حياتـي رهانـه


من يصغي اذنه في حكي كل هـراج
ويسرج ورا ضهر المقفـي حصانـه


هاذا اسمه اجرب والجرب ماله علاج
والبعد عن عدوى مصابـه حصانـه



مجاراه الشاعر منصور سرور التويجري




البـارحـه دواج والـيــوم دواج
بأرض القصيد انقي خزايز سمانـه


ادور الشرد علـى روس الابـراج
اصعد على ماطال واتـرك طمانـه


لفهيد منهاجـه وانـا لـي منهـاج
شيـد بنـاه ولـي بنايـه وزانــه


نفضت بأسبابـه حبيسـات الادراج
قصايـدا بيـن الـورق والخزانـه


كم لي وانا مخلج على الجزله اخلاج
واشتقت يـوم فهيـد صـدر بيانـه


على الطبيعه دون منتاج واخـراج
حـط العتيبـي كـل شـي بمكانـه


مال الضوامي ماردا غيـر هـداج
وللأمانـه غـيـر راع الامـانـه


وبين الردا والطيب مايوجد سيـاج
ولاكـل مـن يـردي نتلـه بذانـه


تغير الدنيـاء بعـد شالـو البـاج
الحنضله شاخت علـى الزعفرانـه




وهذه مجاراة عالي السحاب للقصيدتين السابقتين


دنيا تقلبنا على كل مسهاج
وعود الندا ماهو بعود الشنانه


ودنيا تقلبها عصف الامواج
ولاكل غواصن لفاله بدانه


لاضاقت الدنيا على كل محتاج
الصبر مفتاح الفرج فى أوانه


عن عتمة الظلماء ولعبها سراج
أخير من لعن الظلام وزمانه


والناس بين سلوم ودروب وفجاج
والسيل يجري فى دروب الليانه



أحدن على رأسه تقل يحمل التاج
وأحدن كما الثعلب بروغة ذهانه


وأحدن بليد الحس خبلن وهلباج
وأحدن يخلي رأس ماله لسانه


وأحدن كذوب ولانطق كلمة صاج
وأحدن طبيعه بالغدر والخيانه


وأحدن كما سيفن يلعج العاج
المعتلي اللي رفيعن بشأنه


وأحدن كما نجمن مشعن ووهاج
نوره لغيره واللهب فى كيانه

[ابو خلود]

جاءنى على الايميل دليل الخاطبات ...وكنت بالامس قد كلمت صديق لى مزواج ان صح التعبير بالسابق
وكنت أريد أزوره فى مدينته وسألت أن كان موجود بالعطله والا كالعاده مسافر لزوجته الاخرى واخبرني أنه (مطرود) على حسب تعبيره فأحببت ممازحته وأرسل له دليل الخاطبات وأربطها بكلمة مطرود فى أربعة أبيات

فكانت هذه الممازحه ولقد رد علي ثم رديت عليه


وين الشجاعه اللي بها كنت معهود
كلن شهد لك بالشجاعه شهاده


ياصاحبي أصبحت اليوم مطرود
ياصاحبى دور جديد الوساده


أغنم زمانك دام الوقت محمود
والشيخ مثلك مايعاف الزياده


أرسلت لك دليل ومطلبك موجود
عطنى جوابك فى سريع الافاده








رد صاحبي علي



لا لا تحداني ترى ماأنت مقرود
نشرب قراح الماء ترا الكيف ساده


والعد نرده مايبي جهد مجهود
أن احمد لله ما نصينا العياده


نشري العسل ونبيع من غالي العود
حنا لبسنا الطيب لبس القلاده


خزنة ظفر مقيولة ماتبي شهود
كرمان فى السلم والحرب قاده


مابغى الدليل ومابغى من الناس منقود

خل الدليل للي قليل(ن) سناده




ردي على صاحبي




الامر سلم ولايبي حرب وجنود
ونبغى نشجعكم لدرب السعاده


وأثرك مابك فود ولافيك مجهود
وتبغى الفرار من كل زول وسواده


عزاه ياطير(ن) له المجد مرصود
كل(ن) على التاريخ يذكر هداده



الحر ماينعاف لو قرنس العود
يحفظ له التاريخ وتبقى الاشاده

[ابو خلود]

عندما تتخالط المشاعر والمواقف يتدخل الطبع والسلوك فيسيطر على الوضع ويـفـلسف الامور لتنزوي تحت جناح وستار الحلم والعلم والتسامح
وتصفو النفس وتحلق فى علياء السماء لتهل مشاعرها غيث يغسل الارض
ويفرح الاخرين وتفرح النفس لفرح من جرح ..هذه قمة السعادة والصفاء...وإليكم أخر خواطري الرائقه والتي أسميتها بالرائق عسى أن تروق لكم.....





ياضايق الخاطر على ويش ضايق
لاتكدر الخاطر علـى كـل زلـه


رايق وأسوي غاية الكيـف رايـق
ومـن لايـروق الـيـوم لاراق لله


يروقلك فنجال مـن المـر ذايـق
قمـة رواق وغايـة الكيـف دلـه


ساعة رواقـه تسعـدك بالدقائـق
يمكن تساوي سنين والعمـر كلـه


أنت العزيز اللي لـه العـز لائـق
والناس تعرف كل درب(ن) تدلـه


ليا صار فى مخك كثيـر الحقائـق
عقلك دليلك وأكثـر الهـرج خلـه


أقرب قريب(ن) لك من الناس عائق
والحب مايسكن نفـوس(ن) مغلـه


ومن لاتوثق فـى كلامـه وثائـق
أضحى كلامه مثل سـرد المجلـه


وأن كان ولع فى ضميرى حرائـق
ذكرت ربي كاشف(ن) كـل علـه


يالله يـا زارع بقلـبـي حـدائـق
غيثـك إيلاهـي للفـؤاد وتهـلـه


غيث(ن) يغيث القلب والصبر فائق
نكسبها أجر(ن) وشخص(ن) نجلـه

[ابو خلود]

أرسل صديق عزيز جدا رساله لعلها من منقوله فدبلنا عليه الرد وردينا على أبياته بعجل......



رسالة صاحبي


سر ياقلم وأكتب على مابغينا
سلام أحلى من شهد شمخ نوف


خضر الجبال اللي عليها مشينا
وديانها تسلب هوى النفس والشوف


خص(ن) ليا صار الخوي مهتوينا
شروى جنابك يامعدى عن الخوف


خوينا ياأمن بنا كل حينا
ويسير مركبنا على الشط مردوف



ردي على الابيات السابقه


هات القلم وأكتب على مابدينا
بسم الألأه وعقبها عدة حروف


أهلا(ن) هلابك كل وقت(ن) وحينا
أهلا(ن) هلا يا اللي على الطيب معروف


كلي سرور بخطك اللي قرينا
حيث(ن) قلبي بيننا دوم منصوف


من أجلكم فرحت ساعة درينا
أنك سعيد وطاب لك جو وظروف


يااللي شربنا من غلاك أرتوينا
ياللي غلاه مايبي قول وحلوف


ليه صديق بالمواقف يبينا
أشره عليه وشرهتي مالها وصوف


مدري عليه الحق والاعلينا
والا على ربع(ن) معه صاروا ضيوف


وليا نسانا صاحبي مانسينا
اللي تنقل بين الأوطان ويطوف


أما عطاني العذر عذر(ن) سمينا
والا تراه بكامل الحق مكلوف


والحق يرضي وبالحقيقه رضينا
ياللي على الصدقان دايم بكم نوف

[ابو خلود]

أعطاني احد الزملاء قصيده وقال لي أنها لشخص يعرفه ويريدنى أن ارد عليه لأن القافيه الثانيه صعبه وهويعلم عشقي للقوافي الصعبه ولكن ماجعلني أرد هو الموضوع الذى لا أعلم ان كان خيال والا حقيقه وبكل الحالات انا لست مع هذا النهج والطرح السافر الذى ينافى الدين والاعراف والتقاليد.......






القصيدة التى أتي بها زميلي







ياعين مـن حطيـت عينـي بعينـه .... وابطيت واقف في بحرعينهـا مـوج


ابحـرت فـي عينـه بليـا سفينـه .... سجيت فيها ليـن ضيعنـي المـوج


حاولت الـد الشـوف عمـا يهينـه ... ولا إنتبهـت الا وانـا فيـه ملبـوج


شفت الفتـن فـي ملتقـى حاجبينـه ... والسحر في عينه مع الزين مدمـوج


اسـود سـواده لابستـه السكيـنـه ..... وابيض بياضه طايش اللون مرجوج


زاويـه طـرف ٍ حاجـز ٍ دمعتينـه ..... لولاه كان الخـد بالكحـل ممـزوج


كاسيـه رمـش ٍ زاد ملحـه وزينـه ......من فوق متكحل ومن تحت مدعـوج


بين الرموش السود شفـت الغبينـه.. واللي رماه الرمش ماعاد لـه بـوج


مرت ثوانـي مـن حياتـي ثمينـه ... وأنا اتهـادى بيـن الاشـواق وأدوج


مرت وأنا قابـض علـى راحتينـه .... واقف مقابل لـه وساهـي ومدلـوج


مدري وش اللي صار بينـي وبينـه ..... والقلب ماردنـه ضلوعـي العـوج


ولا إنتبهـت الا بسحـبـة يديـنـه ... قال انت تبغى الناس تلحقني بهروج


قلت اعذر اللـي شافـك الله يعينـه ... يبطي ودمعه بعـد فرقـاك مزعـوج


عينـك بنظـرات الغـلا مستهينـه .... قال الغلا في داخل القلـب منسـوج


قلت الوعد قال ايـه كلـش بحينـه .... الله يفتح لك مـن الضيقـه فجـوج


قلت آآه .. طيب شف لي الدرب وينه .. قال انتبه باقـي علـى شفتـك روج


قلت لهـا أدري بـس لا تمسحينـه ..... أبقهـر بلونـه مطافيـق وعـلـوج





رد عالى السحاب على القصيدة السابقه







قال الذى من جد بيح كنينه........وسط الضماير هاجسي ساجني سوج




حطيت للمعنى بروج(ن) حصينه.........والباب من دونه مغلق ومزلوج




تلاطمت بحور نفسي سجينه............وتحاشرت تبيلها أذن و أخروج




قلت اركدي وجاك اللي تبينه...........نبي نطلعكم فوج(ن) ورا فوج




وأوصيتهم فى جزلها والسمينه..........وندبت قائدهم من داخل دروج




جنا كما برق(ن) تقافا غشينه.........وراحن كما خيل(ن) بليات سروج




شاعر ولاشك المعاني تدينه.......قال الكلام اللي على العرف ممجوج




شعره جميل (ن) والمعاني هجينه.........ماينقبل حتى لزوجه مع زوج




كانه خيال قد تعديت عينه..........وكانه حقيقي كامل الهرج مرهوج




الله ستركم وكاشفين الدفينه.........ياراعي المعنى ترا الدرب مسهوج



مجاهره تبقى عليكم غبينه.............ماهى لنا عادة خواجات وزنوج




كلن يزود ماذكرتم بحينه.........ويزيد بالهرجه على الخلق ويدوج




مادام راع الشأن بين خزينه...........الله يعينه من على زود منتوج




كلن على ماقيل تحسب سنينه..........أما على خير(ن) والا على عوج



والسر عند الناس سلعه أمينه...........السر خله داخل القلب ملفوج




ليتك سترت اللي بينك وبينه...........حتى ولو أنك من الوجد مخلوج




كلن محاسب فى كلامه ودينه...........أما سقط والا أرتفع عالي بروج




وصلوا على المختار يا ذاكرينه .......أخير من بعض السواليف وهروج

[ابو خلود]

كان الشاعرمسجون
ماراً من أحد الممرات وفي ذلك الممر كانت

) ريم وأمها ) داخلين لزيارة سجينهم

والشاعر سمع صوت الأطفال فتذكر أبنائه

فدمعت عينيه

فرأته ( ريم ) فقالت ريم لأمها :

)يمّه الرجال يبكي !! ،، فقالت أمها زاجرة : ريم (

عندها ،، كتب الشاعر هذه القصيدة

::

أبكي وعيني تسهر الليل يـا ريـم
مدري بلاها الشوق والا الظليمـه

يا ريم دمع العين مدري على الريم
والا على قلبـن تواكـل صميمـه

تقول لاطمني علـى نونهـا سيـم
أبكي وعندي لأزرق الدمع قيمـه

ويمكن يكون الدمع للعيـن تكريـم
ويمكن يكون إلها عذاب وحريمـه

والله يا لولا دمعتـن كنهـا الديـم
راحت ضلوعي من عذابي حطيمه

ودام البكا يا ريم ما فيـه تحريـم
يا عنك والله لأرخص الدمع شيمه

وابكي على حالي من الوجد وآهيم
لين الزمن يخلـف عليّـه نسيمـه

أبكي حياتن صافيه ما بهـا غيـم
وين المحبـة والقلـوب السليمـه

أبكي قهر وابكي من الغبن والضيم
وابكي من طعونن بقلبـي قديمـه

غدر الزمن خلّى بوجهي مراسيـم
وما يذبح الرجال مثـل الهزيمـه

بعض المصايب شرها ياكل الهيـم
وشلون بكبود الرجـال الكريمـه

وبعض المصايب يخلفن المفاهيـم
تبغى على ما قيل صبر وعزيمـه

مظلوم بالدنيـا وغيـري مظاليـم
من عرض ناسن لبسوهم جريمـه

ما عاد أبي من سود الأيام تعليـم
عقب العذاب اللي كلاني جحيمـه

ولو تصفي الدنيا علـيّ الملازيـم
ما عاد أدور من وراهـا غنيمـه

أعجبتني الابيات السابقه التى أرسلها أحد الاصدقاء الى إيميلي
فتفاعلنا معها وكانت هذه المجاراة والرد من عالي السحاب ......



يابنت ياللي خاتمة أسمك الميم
لك قلب صافي والنوايا سليمه

ياريم قولك زاد بالقلب تازيم
لقلبٍ حزين زايدٍ فيه ضيمه

هاض الفؤاد وصار بالقلب تاليم
أضحت حياته مدلهمه عتيمه

تبكي عيونه للمدامع مرازيم
يشكي أجروحٍ فى حياته أليمه

والدمع مابه عيب ولافيه تأثيم
قبله بكت حتى الرجال العظيمه

لاشك دمع الغبن للرجل تحطيم
لا ضاقت الدنيا عليه اللئمه

مابين حزن وظلم للسجن تحجيم
والنفس تاقت للحياة الكريمه

ضاقت به الدنيا وبالنفس تكتيم
ودمعة حزن لأهل القلوب الرحيمه

لاضاقت الدنيا وبالبال تعتيم
تبكي ترا حتى الرجال الحشيمه

لاشك يبغى له من الصبر تصميم
صبر(ن) جميل للرجال الفهيمه

ومن لاتعلم ماتفيد التعاليم
والعمر فاني والليالي قديمه

ووجهت وجهي لخالق الكون تنظيم
نخشى عذابه ونرتجي من نعيمه

[ابو خلود]

كلمات أرسلت لي من صديق عزيز وربما تكون ليست من قوله بل من منقولة ولكن رددنا عليه وجاريناها أكراماَ له وتقدير...عسى أن تعجبكم الرسالة والرد...



بالجود تحيا الناس والناس للناس
وحنا بكم يا خيرة الناس حيين


أنتم لكم فى ذاتنا راسخ الساس
وأنتم كذالك بالمكارم وفيين


أقولها من عمق قلبي والأحساس
من دونكم تعمى البصيرة من العين


ردنا على صاحبنا



حييت يا مشعل من العز نبراس
لا حل طاريكم ترا قلت نعمين


صحيح لا قالوا ترا الناس أجناس
لا شك مثلك نادر(ن) بالملايين


أغلى من الياقوت مع صافى الماس
معدن نفيس ماله اليوم تثمين


لك التحيه كل ماهب نسناس
أزكى تحيه للرجال الميامين

[ابو خلود]

أرسل لي أحد الزملاء الاعزاء بيوت جميله ولاأعلم أن كانت له أم لا ولقد ردينا على رسالته
برسالة ومجاراة عسى أن تعجبكم الرساله والرد.......



للشعر فى ذكر المطاليق ميقاف
فهود الرجال اللي تشيل الثقيله

وسوق المعاني تختلف فيه الاصناف
ولاكل من دشه يصيد الجزيله

نوادره تصعب على كل عراف
ولاكل خيال يعسف الاصيله

الناس تحكمها تقاليد واعراف
والمدح يزهى بالرجال النبيله

تستاهل الفنجال ياشبل الاشراف
من بن صنعا فى يمينك نكيله

حلياك حر(ن) ماكره رأس مشراف
أخذت من شقر الحرار الفصيله



وهذا ردي ومجاراتي للأبيات السابقه




أسقيتنا من غاية الكيف لي قاف
كله شموخ وله معاني جميله

قطفت لي من نادر أشعارك أصناف
أنت قطفت زهور جني الخميله

وأسقيتنا من رايق الشعر مرشاف
كنك جنيته من سحاب المخيله

والعرف مايعرض على كل عراف
يالصاحب اللي مابغينا بديله

يالنادر اللي كاملات(ن) بك أوصاف
ياللي طبايعكم تشرف قبيله

ياللي لصعب القاف فارس وعساف
ياللي تجيد القاف مافيك حيله

[ابو خلود]

وصلتني بالامس رسالة من صديق وزميل عمل ولا اعلم أن كانت الابيات التى ارسلها من قوله او منقوله ...ولكن تفاعلنا معها وكان ردنا حاضراً أتمنى أن تعجبكم الرساله والرد.....


رسالة صاحبي


ياطير خذ مني سلام وتحايا
واقصد بها ناس(ن) على العز رابيين


ناس(ن) لهم طبع المحبه سجايا
وفيهم من اصناف الكرامة عناويين


مااقول فيهم شعر أبغى جزايا
لأنهم عن الاشعار ياناس عاليين



ردنا ومجاراتنا


حييت ياطير(ن) تعلى بسمايا
ياللي لفيت بقول ناس(ن) عزيزين


ياطير بلغ مع سلامي وصايا
لناس(ن) لهم قدر(ن) على الراس والعين


ناس(ن) توافق مع هواهم هوايا
اللي على راس المعالي وفيين


اطيب تحياتي واخلص دعايا
للي على الهقوة والعرف والدين


وأجمل سلام(ن) للرجال الطنايا
اللي لهم بالطيب ترجح موازين

[ابو خلود]

فكاهيه للشاعر : عبدالله سواد الغرابي الحربي




يانـاس ياليتنـي مزيـون=حتـى العـذارى يحبنـي
اشهب وشايب ولاش سنون=وان جيت للبيـض هبنـي
لاقلت وش فيكـم تهبـون=قالوا بسم الله تقـل جنـي
نبي راعي كامري مجنون=وجـوال ومسجـل يغنـي
صحيبناماهومثلنا باللـون=ابـو توالـيـت متثـنـي



واليكم هذه المجاراه من شاعرنا والتي كتبها على عجل......

سلام يا الشايب المفتون
واجمل تحيات لك مني

أمشى على دربك المسنون
وين أنت للغيد متعني

مثلك بالمسجد يصلون
مع دلة الكيف والبني

تمشي على العرف والقانون
وتبعد عن الشك والظني

أذكر عجوزك ولا تهون
عساك يا رب متهني

[ابو خلود]

بيت من الشعر طلب مني أحد الاصدقاء أكماله ولبينا له طلبه ببيوت محدوده بناء على طلبه كذلك
وأن كان بالامكان أحسن مما كان......


دايم أهذري بك ولاشك بسكات
خوفي من اللي ينشرون الأشاعة


وهذة مجاراتي وأكمالي للبيت السابق




قامت تقافا دقـة القلـب دقـات
تسارعت دقـات قلبـي بساعـه

ساعة سهرت الليل والجفن مابات
وقلبي يردد دوم سمعـاً وطاعـه

طيفك مصاحبني على كل الأوقات
وقلبي على طيفك سريع اندفاعـه

أنا صويب اللي عيونه وسيعـات
وأن أحسبني منه عنـدي مناعـه

أخفيتكم بالقلب عن كـل شمـات
يابعد حي(ن) من كثير الجماعـه

لكم حيا قلبي وعن غيركم مـات
أنت الوحيد وعند قلبـي قناعـه

[عالي السحاب]

أعجبتنى أبيات عساف ومجاراة الجدي له فى أحد المنتديات مما دفعني لأعتلاء الرجم ومجاراتهما مع خالص التحيه لهما وللجميع........


قصيدة عساف


عيني تبسملك من الشوق لاجيت
والقلب يخفي مايوده لساني

ماغير اردد بالتراحيب حييت
ولاالذي في داخلي شي ثاني

ماهو بكيف القلب لاكني ازريت
ابين اللي طول وقتي شقاني

اخاف كلمه تجرحك مني واخطيت
واصبح عليها نادماٍ في زماني

احسن لي اسكت واردف البيت بالبيت
وخلي اعيوني لعينك معاني

ونوح نوح الورق لامنك اقفيت
تخنقني العبره على مادهاني

هذا جدايه كل ماصبحت وامسيت
وانته ولا تدري وش اللي بلاني


مجاراة الجدي

عساف حركت المشاعر وناديت

ناديت هاجوس غيابه ثواني

انا مثل حالك من الشوق عانيت

وعاذرك دام انك سواتي تعاني

لو ان كلمة ليت تنفع تمنيت

لكنها حرف درسته زماني

الله يجمع شملكم بعد تشتيت

وتعيش ياعساف بأمن وأماني

واسف تراني عن حدودي تعديت

مير السموحه ياسهيل اليماني



مجاراتي لعساف والجدي

البارحة فى عالي الرجم نطيت
أبعد عن الديره وشوف المباني

رجم(ن) خيالي بس يمه تعنيت
مدري وش اللي ياجماعة دهاني

طارت بي الذكرى على كل توقيت
بقلب(ن) كواني بالضلوع المحاني

مدري نساني الوقت والأ تناسيت
والظاهر اني ماكسبت الرهاني

أن أحسب أني من جروحي تداويت
أثر الجروح الكامنه فى كياني

أليا هاجت الذكرى من قلب ونيت
يغيب فكري ليا قريت المعاني

راع الهوى قلبه على كف عفريت
ما طعت عقلي يوم عقلي نهاني

[عالي السحاب]

بيوت من الشعر قرأتها فى أحد المنتديات وأحببت مجاراتها مع العلم أننى لا أعلم من قائلها ...ولكن لنقل إنني تفاعلت مع معانيها وأرجو أن تعجبكم القصيدة ومجاراتي لها......
يا عمري الدنيا ما تسوى تنام وخاطرك زعلان

ولابه شي يستاهل يخلي قلبك يعاني

طلبتك كان لي خاطر تبعد عنك ألأحزان

فديت أعيونك الحلوه تبسم لو على شاني

حبيبي صار لي مدة أشوفك تايه وحيران

وانا والله لا شفتك حزين تزود أحزاني

أنا احبك ولا ودي تعيش بدنيتك ندمان

ترى ألأيام محسوبة وتالي ها لعمر فاني

تصدق بسمتك والله تفرح خاطري الولهان

يطير من الفرح قلبي واصير بعالم ثاني

والى من شفتك بضيقة أحس اني انا الغلطان

أعاتب نفسي بنفسي ولو ما كنت أنا الجاني

غلاك بداخل أعروقي ولا يوصل غلاك انسان

يمر الوقت ويثبت لك غلاك ان الله أحياني

أضحي بعمري لعيونك تنام انته وانا سهران

ونادي جروحك لقلبي تجي واحد ورى الثاني





مجاراتي للقصيدة السابقة


صحيح أن الزعل يمرض وصحيح أن العقل ميزان
وصحيح أن الهوى قاتل سكرت عنه بيباني

راع الهوى كما الوردة لمالت حولها الأغصان
قبل ما تثمر الوردة يجيها عاصف(ن) عاني

شلعها من على غصن(ن) وسقاها مية الحقران
ورماها رميت الميت رماه المجرم الجاني

صحيح أن الهوى غدار لقـلوب مالها عـنـوان
خذيت العبره من غيري تجارب مر وأحزاني

سـقاك الغـيث ياذكـرى من وبل غـيثها هـتان
دفنت كامل الذكـرى فى قـبر عزمي وأيـماني

طويت صفحة الماضي فى قلبي طويت الكتمان
كـفـاني ما تـجـرعــتـه كـفانـي بـس يـكـفانـي

غـريـب ديـار لطـالت به الرحـله عـن الأوطان
مشاعرنا من الغربة تثور ثورت بركاني

سـريـت بلـيـلـة الذكـرى وطـول صـبحنا مابـان
نطرت الصبح من بكره ونور الصبح ما جاني[/justify]

[عالي السحاب]

هذه الكلمات لي وهى قديمه بسبب موقف معين وظرف خاص طواه النسيان وكنت موجهها الى أحد أبناء عمومتي وهو شاعر متمكن ولكن لايحب الظهور للملاء كشاعر وأن كان فى هذا الرد كان قاسي بعض الشىء فلقد أخذ تفكيره منحى غير الذى كنت أقصده......


الابيات التى أرسلتها لأبن العم



ما جور يا قلبن ذرف دمعتــــــــــــــــه دم
صلب ليا جارت صروف الزماني

اصلب من الفولاذ والين من اليـــــــــم
مجبول بالعزة وحب وحنانـــــــي

يبعد عن الغيبة ويكره أهل النـــــــــــم
وطبعة كريم ولا يحب الهوانـــي

ويعفو ليا من المخاليق تظلــــــــــــــــم
واصله رفيع ولا يتقبل حسانـــــي

الطيب يسعاله ويبعــــــــــــد عن الذم
قلب(ن) سعى لود قاصي ودانـــي

نار على خصمه كافر ومسلــــــــــــم
والنار ما ترحم من الناس جانــــي

وجنة ولوأن المخاليق تلتــــــــــــــم
تاسع اركونه كل شخص بمكانـــي

يكضم على الشدة ويصبر على الهـم
ويكتم جروحه ولا يبين بيانـــــــي

وفكرت بالموضوع وهو ما بعد تـــم
وبغيت ابوح ولا نطبقه لسانـــــي

وجبت القلم لعل عنـــــــــي يترجم
حزن تعظم بالضلوع المحانـــــي

وسطرت بالكراس بنين منظـــــــــم
يوم نومي بالليالي جفانـــــــــــي

واسندت للي بالمواقيـــــــــــف يعلم
يرسي ليا منه بار الهدانــــــــي

اكتب صديق الروح واكتب ولد عم
وبين حقائق ما خفا بالبيانـــــــــي

اقبل سلام مني وأسلم وسلــــــــم
على أبو(.......) ياعريب المجانــــي

وقله ترى الصرح المعظـــم تحطم
وتحطمت كل المبادي بكيانـــــــي

يا للأسف هو كيف صرحي تحطم
ولا ظنتي يـبني ها كالصرح ثانــي

متنوعيــــــن بيــــــن نذل ومجرم
هدوه من غيرة سيف وسنانــــــــي

يامسندي ما ينعرف عدهم كـــــــم
وجيه الغنم وقلوب ذياب وحصاني

صابوا فؤادي بسهم غدر مسمــــم
سهم رماني من سهيل اليمانـــــــي

القلب ولعب به والنار تشعـــــــــم
وحتى الحديد من قسى النار لانــي

وقلب العنا يامسنـــــــدي لحم ودم
ولا تلموني إن كنت لحزني أعاني

وتم الجواب عل خطــــــي يترجم
درس درسته ولا فهمت المعانــــي

والله يعين اللي على الجرح يكضم
وصبر جميل(ن) والله المستعانـــــــي






( رد أبن عمي)


يالله ياللي بغيب الأيام تعلـــــــــــــم
ياواحد(ن) اشانك على كل شانـــــــــي

انت الرحوم ولا لنا غيرك ارحــــم
سبحان من عرشه على الكون كاني

تسمع دبيب الذر بالليل الاظلــــــــم
كريم ما عندك عليّ يخفانـــــــــــــي

جيت ابي أنام وقال من قاللي قـــــــــــم
تحطمت كل المبادي بكيانــــــــي

وقفت من نومي تقول جارع(ن) سم
مدري وش اللي يا جماعة دهانــــــي

اطلب ولو تطلب عيوني ترى تـــم
ما هي عطيت واحد(ن) مسردانـــي

انا لك الين من الحرير المنعــــــــم
ولعداك اقسا من صفا راس ابانـــــــي

امر وان لأمرك موقع وخاتــــــــــم
من هو الذي يقدر يقطع أذانـــــــــــــي

عداتنا بالغصب نشرب من الجــــم
والرس تردة عوجها والحصانــــــــــي

دامك معلم ولا تبيلك معلـــــــــــــم
عقلك دليلك عن مزلة لسانـــــــــــــــي

لا شك عنهم دوك والخالق أعلــــم
اللي أعرفه وأترك اللي يخفانـــــــــــي

تبكي ربوعن فانيه قدلها كــــــــــم
ماباقي الا رسومهم والمبانــــــــــــــــي

يوم الرجال رجال تنكف وتقـــــدم
يربح ليا جاهم من البعد عانـــــــــــــي

امنولن يخافهم كل من هـــــــــــم
ويدري غضبهم كل قاصي ودانـــــــي

وإلا ربوع اليوم عشرج وعلقـــــم
عود الندأ متبدل(ن) بالشنانــــــــــــــــــي

ما عمهم فيهم شطيرن ومدقــــــم
متخالطن وسط الحرق زعفرانــــــــي

أحد على ربعه سبيلين يقســـــــــم
واحد على ربعه مهفت أعمانــــــــــــي

ما قصدنا فيهم شماتــــــه ولا ذم
لا والذي عنده لقانا ضمانــــــــــــــــــي

لا شك حد النفس نفسن تألــــــــم
وأنا طبيعة خاطري مر حمانــــــــــــي

قامن بحور الغيض فيه تلاطــــم
وأزريت أقاوم ضرس اللي شظانــــــي

أن الذي لا قلت قولن اتمــــــــــم
ما هي حجيت واحد شغلبانـــــــــــــــي

نوب تساهلك ونوب يتغانــــــــم
يدرق كما تدرق حتوف الزمانـــــــــــي

امنين ما وجهتني حاضر وســم
الله على شرواك لا أمره هدانـــــــــــــي

محد سمعت أنداه بالحلم والعلـم
الا أنت يالي في مقاله دعانــــــــــــــــي

والله والله واحد ما حكم ظلــــم
إني يمينك لين يابس شنانـــــــــــــــــــي

[عالي السحاب]

أرسل لي أحد الاصدقاء أبيات وسلام جزل ولعله من منقوله وليس من قوله
ولكن بما أنه أحسن الاختيار وخصنا بما أرسل لنا وبما نعرفه عنه كرم الاخلاق
ونبيل الصفات ردينا وجارينا رسالته ..عسى أن تنالا الاستحسان ...

رسالة صاحبي


سلام يامن توج الطيب ماضيه
يافزعة المنظام أول وتالي

سلام احلى من خلاصٍ معديه
مع كيف طبخ مبهرات الدلالي

ألذ من طعم العسل من مجانيه
وأعذب من الماء القراح الزلالي

وأصفى من الياقوت دره وصافيه
وأغلى من اللي بالموازين غالي

سلام صافي من ضميري معانيه
من أول حروف القاف لاخر مقالي

منصاه حر(ن) شامخات(ن) مساعيه
ذيب الفعول الوافيات الجزالي




ردي ومجاراتي للأبيات السابقة



أهلا(ن) هلابك عد ما كل تطريه
تحية لك مثل وبل الخيالي

أهلا(ن) هلابك راعي الطيب راعيه
ياللي فعولك معجزات وخيالي

انت الذى مثلك بعيده حراويه
مثلك تراهم نادرين الرجالي

مثلك عزيز الذات ربه محليه
يا النادر اللي بك كمال وجمالي

لابحثون القلب كافيه مافيه
لاتبحث المكنون لا جاء مجالي

هذا زمان(ن) واجدات(ن) بلاويه
هذا زمان(ن) شاخ فيه الريالي

شيخ(ن) يحكحك باللوازم علابيه
ياعل ما له تالي الوقت والي

واقبل تحياتي لك الود نهديه
يا الشامخ اللي فوق روس المعالي

[عالي السحاب]

وصلتني عدة رسايل على الجوال من أصدقاء ....طبعاً الرسائل ليست من قولهم ولكن من الرسائل المتداوله وقد لايعرفون من أصحابها الحقيقين ولكن أنا رديت وجاريت أكراماً لأصحابي


الرسالة الاولى


علمتني ياذيب أتعب على الطيب
ومن زود طيبك صار طيبي طبيعه


ردي على الرسالة


علمتني با ذيب أبعد عن العـيـب
أبـعـد ولـو ضـاقـت عليه الوسـيـعه

طبقت درسك حافظه قبل ماأشيب
درسـك حـفـظـته صار ليه شـريعه

وأنا صغير السن شلت المواجيب
رقيت أنا بروؤس الحصون المنيعه

والناس لو تخطئ عليه ولا تصيب
قـلـبي سـمـوح والـمشـاعـر رفيعه

الطيب وهـبه لعالم الـسـر والغـيب
لاشـك راع الطـيـب بـطـيـبه نطيعه



الرسالة الثانيه


سـلام وافـي لـلعـزيـزين ينقال
يبدأ مبادي النجم فى كل ليله

أعداد مايدرج من الكيف فنجال
بين الرجال أهل النقا والجميله



ردي على الرسالة



بك البقا ياللي لفا منك مرسال
وأجمل سلام لكاسبين النفيله

وأعداد ما هل السماء وبل همال
عد البروق وعد وبل المخيله

وأعداد احطوا من الكيف بدلال
كيف(ن) معطر بزعفرانه وهيله



الرساله الثالثه


يامرحبا ترحيبتن كلها شووق
خـطـرن عـلـيها لاتـولع حـريقي

يا مرحبا مليون يا كامل الذوق
من كثر ما رحبت بك جف ريقي

مقداركم والله على الرأس من فوق
هاذى الصراحه والشعور الحقيقي



ردي على الرساله الثالثه


أهلاً هلا بك عد ما لاحت بروق
مليون مع مليون لك ياصديـقي

ياللي غلاكم يجري بالدم وعروق
مثل الهواء يجري زفير وشهيقي

ترحيبكم سابق ولاهو بمسـبوق
ياللي غـلاكـم وسـط قـلبـي وثـيقي

[خاطري لاتجرحونه]

تسلم الأيادي على جمال الطرح وبارك الله فيك
ننتظر جديدك وفيض قلمك
دمت بحفظ الله ورعايته