سلام الله على طيبه بلاد محمد المختار == عسى وبل الحيا يركي عليها لين يرويها
أنا فيها أفقد هموم الزمان وكثرة الافكار == وانا لاقي علاج العين وعلاج الحسد فيها
أحب أرض المدينه واهلها اللافين والانصار == واحب قصورها وجبالها اللي من حواليها
واحب أول مساجدها محبه مالها معيار == ولا اصبر عن حرمها اللي له الاقدام نحفيها
واحب الروضه اللي قال عنها سيّد الابرار == تراها من رياض الجنّه وهذا يكفّيها
عسى من حب طيبه مثل حبّي مايطب النار == عسى الفردوس تفتحله من أولها لتاليها
والا ياضلع أحد بالله حدثنا وعطنا أخبار == عن علوم" مضت عندك خبرها مانت غاويها
هنا حاجه على أسمك سمّيت ياطيب الاذكار == ترا من شافها ماهو مثل من سمع طاريها
هنا حمزه كسر شوكة قريش وجيشها الجرار == وسجّلّه بطوله عجزت الايام تمحيها
هنا طلحه وابو طلحه هنا الصّدّيق راع الغار == هنا الفاروق صاحب سيرة" ماحد" يجاريها
هنا عثمان ابن عفان تاريخه يشع أنوار == هنا علي ابن أبي طالب سرايا القوم يثنيها
هنا سعد ابن أبي وقاص نعم الفارس المغوار == هنا ابن عوف وابو ذر والعزه وطاريها
هنا مصعب واسيد ابن الحضير وجعفر الطيار == وابن عوّام لدارت رحاها صار راعيها
هنا زيد وهنا زيد وهنا زيد الثلاث أخيار == رياجيل" فعايلها تشابه مثل أساميها
هنا سلمان راع الخندق اللي عقّد الكفار == هنا اسامه وابوه أهل الكرامه في معانيها
هنا اليمان وحذيفه وابن مالك حماة الجار == هنا عدي منقذ طي من غبّة معاصيها
هنا الرومي صهيب وسيّد الخزرج من الانصار == هنا زعيم كل الأوس وآمرها وناهيها
هنا النعمان والخدري كبار الهمّه الاحرار == هنا المقداد ناصر سنّة محمد وحاميها
هنا ابن الصامت وعمرو وفضاله أفنوا الاعمار == هنا كعب ابن مالك داحر الفتنه ومخزيها
هنا حاطب وابو موسى وابو بكره وكعب أحبار == وابو أيوب الانصاري خصاله صعب نحصيها
هنا خالد وابو هريره رجال" باللزوم كبار == وابن مسعود وقفاته مافيه أحد" يساميها
هنا عبدالله العباس له هيبه وله مقدار == هنا كعب ابن عجره والمعالي كعب راقيها
هنا السكران ابن عمرو وبلال وجابر وعمّار == وابن شعبه وابو رافع صحابه من يوازيها
هنا شاعر رسول الله لا موذي ولا ثرثار == يقول أبيات شعريه وروح القدس يوحيها
هنا ابن آثال والداري تميم معقبين آثار == هنا حرام ابن ملحان والحسنات حاويها
هنا جبير ابن مطعم وابو سفيان لهم أدوار == هنا ثوبان مولى سيّد الأمّه ومهديها
هنا معاذ وجليبيب ماتثنيهم الاخطار == هنا أخو حفصه اللي سنّة المختار يرويها
هنا ابن النظر والبجلي وسمره قدوة المحتار == هنا كل الصحابه ليتنا نسوى مواطيها
سلام الله على دار الشهامه والوفاء والكار == مدينة سيّدي وانا عدو اللي يعاديها