هذه قصيدة للشاعر دحام الهذال العنزي يتوجد فيها على ديارهم القديمة الحناكية,وقد عارضها الشاعر الكبير محمد العسيلي رحمه الله.

يقول دحام العنزي:







جيت المطار ويمه الشـوق جابنـي=شوق بـرى حالـي ودمـر شبابهـا
جيـت اتباهـا وتناسـا مواجـعـي=واثرى جروح الحب يكبـر عذابهـا
امشي ورى قلبي واداري عواطفـي=واعرف دروب الحب واسلك صعابها
عزى لنفـس مـا استلـذت بعيشهـا=غـوت غـرام الغاويـات وعذابهـا
قالوا لي انسي من نستك وتزوجـت=وسدت بوجهك تالـي الوقـت بابهـا
قلت اعلم اللي صـار بينـي وبينهـا=وادري تلاشت " مي" واقفت اركابها
هذي ثمان اسنيـن والقلـب عندهـا=ينزف جروح ودم قلبـي خضابهـا
ياما مشت رجلي على شوك دربهـا=تتبعني الذكرى وأنا اطـرد سرابهـا
كنت احسب ان الحب يسلا وينسـي=واثـره توقـد بالضمائـر وصابهـا
لي كلمة لاضـاق صـدري وقلتهـا=كلن يحسب مـا وراهـا ومـا بهـا
عفت البشر يوم البشر تاكـل البشـر=والحقـد يمنـع وصلهـا واقترابهـا
من قل مالـه قـل قـدره وهيبتـه=وتكثـر عيوبـه ويتكابـر مصابهـا
ورجله ليا جـت المجالـس تعثـرت=كلـن يحـاول ردهـا واجتنابـهـا
لقيت ناس أجواد والطيـب ساسهـا=والعـوز مـال بشأنهـا والتوابـهـا
ولقيت نـاس عفـون كلـن يذمهـا=وزود الغنى والمـال شيـخ جنابهـا
مشيت من همي وطالـت مسيرتـي=في صحصح تاه القدم في هضابهـا
وجيت " الحناكيه" وهاضت قريحتـي=بابيات حـزت خاطـري واعتنابهـا
ذا مربط خيولـي وهـذي مزارعـي=عقب اخضرار الغصن يبست اخشابها
وهـذي بقايـا مـن بقايـا منازلـي=واطلال يجتـاح الضمايـر ضبابهـا
دار " لنا " واليـوم صرنـا نمرهـا=جنـاب تخشانـا الديـار ونهابـهـا
عقب المعزة بـاول الوقـت والغـلا=اليـوم مـا نلقـى مكـان برحابهـا
عـز الله ان همـوم قلبـي تعامـت=والنار فـي جوفـي يزيـد التهابهـا
من قلت الحيلـه كوتنـي عزيزتـي=مالوم عينـي لـو يطـول انتحابهـا






ورد العسيلي رحمه الله:




لاباس يـا دحـام يـا معـدن الوفـا=يابن الرجـال اللـي عزيـز جنابهـا
عاشق ولك قصة طويله مـع الدهـر=والناس كـل لـه ظـروف شقابهـا
ولا انت الوحيد بـه الغرابيـل كلهـا=ولا كـل عايبـه يعيـبـك عيابـهـا
تشكي زمان مـا يصالحـك صالحـه=كـن الديـار موجهـه لـك حرابهـا
جيت " الحناكية " وجـادت قريحتـك=وفتحت دعوى مؤصد الوقـت بابهـا
توجـد علـى دار مزايمـك حيفهـا=مـا تقـل عقبـك عامـري وطابهـا
والدار نزلناهـا علـى شـرط وقتهـا=واضفينا على الدار العزيـزه حجابهـا
وامّنـا مخافتهـا وحمينـا عفافـهـا=وأقمنـا عمارتهـا وزرعنـا ترابهـا
لين أصبحت يخشى عليها من الحسـد=خص من اللي قد زرعها ورعى بهـا
اللي تركها يوم هـي غـض عودهـا=بظروف خسايرهـا تكلـف حسابهـا
هاك الحين يـوم القنـا يقـرع القنـا=والخيـل يـم الخيـل عـوج رقابهـا
اختـار لـه درب يـوديـه للسـعـه=عن ضيق مؤنتها وعن شر مـا بهـا
تسوقه الغربي وتضحـك لـه الصبـا=وتدعيه نجد الليـل وسـاع رحابهـا
يا بو بدر نفسك تمادي بهـا الهـوى=تحيل البـروق ولا يمـرك سحابهـا
وابحرت في بحر الهوى لين عام بـك=بعيـد عـن بـر السلامـة وآدابهـا
لا ارتحت من كيد الروابـع وجرهـا=ولا ادركت "مي" اللي سطا بك صوابها
وأنت تعرف ما طاب لك ما يدوم لـك=ودنيـاك عامرهـا نذيـر لخرابـهـا