دخيلك كان لي خاطر تقفل لي على الموضوع=مادامك عارف لا غبت لي غيبتك وش تعني .
تخليني لحزني والدفاتروالسهر مقطوع=وبقايا ذكريات في مهب الريح تدفعني .
تخليني لليل كنت في داجيه لي شموع=ونديم كل مابثيت له بوحي تسمعني .
ماابيك تغيب لا واللي رفعهن سبع يادلوع=غيابك منه كل احزان خلق الله تصنعني.
تودعني تغالب عبرتك واودعك بدموع=بيوم فيه كل عيون عذالي تقطعني .
وتغيب وتترك الفرحه لقلبي مثل حب الكوع=احس انك ليا ودعتني جتني تودعني .
حرام انك تعرضني متاهات الضمأ والجوع=وعلى اول مفترق سكه تواجهنا تضيعني
ابيك ان ضاقت الدنيا على مثلي وطن وربوع=تلملم ذكريات احلى سنيني ماتوزعني
تربع في حنايا قلبي اللي بالغلا مزروع=وعوضني زمان غبت فيه الوقت لوعني .
واذا الله قدر الفرقا علينا غصب والاطوع=ولاطاوعك ظرفك والزمن عيا يطاوعني
وعزمت الرحيل وغيبتك ماهي شهرواسبوع=على مابايعك قلبي عليه ابغى تبايعني
على عهد الوفا نبقى وباقي زبدة الموضوع=على اهون ياليتك لوتسافر ماتودعني