ياسلام الله على اهلي والوجوه السفره=عد ماطار الخيال ويمهم وداني

يالسحاب اللي على صمعور يسكب طهره=مثل طهرك ياسحاب الخير طهرٍ ثاني

طهر قلبٍ في معادي عوف يعلن كفره=كان عيسى واحدٍ منهم فانانصراني

اقسم بربٍ جعل بين المناسك نفره=إن لها في شرع شوقي منسكٍ يغشاني

يامحلل مرس قلبي لاتحل الشفره=ماتبي تحليل مادام الامر رباني

كل شخصٍ بينهم لو يوم تذهب عفره =والله إن لتسوقه القدره على ذيداني

لو تفرقنا الليالي والسنين الخطره=أسرق ايامي من ايامي واجيهم عاني

ديرةٍ فيها زرعت الود بذره بذره=لين وبّرة النخل واهديته لصدقاني

ياشجرها ياحجرها اهواك كسره كسره=ياذراها وياهواها انا هواك إهواني

إن تنفست الغلا من شهقتي للزفره=كل ذرات الغلا عبر الرئه تملاني

وإن نخا قلبي وتينه قال عطني قطره=جت كريّات الغلا بالدم في شرياني

عشت فيها العمر الاول والوفا والعشره=ياصفوف المدرسه كتب الوله تقراني

جعل اهلها مايشوفون الليال العسره=جعلهم في ظل امان وتمر عذقٍ داني

سحرها اللي ساحرتني فيه واعلن شكره=إنها تنفث عقدها من ثرى جداني

وذنبها اللي أطلب من الله عسى مايغفره=إنها مستيسره في حبها وجداني