سر يا قلم وأكتب من الشعر ما جاك = رد الثناء هو هاجسي هو لزومي
جنب عن التقصير في خط ممشاك = في مدح من ذكره لمثله يشومي
في مدح أبن رداس ما ظن يخفاك = اللي محله مدهلٍ للعمومي
سجل جزيل المدح وأشهد بمعناك = بأبيات تبقى مثل سبع النجومي
يوم المعالي كلها طوع لرضاك = حرٍ على الجزلات دايم يحومي
يا شيخ أنا ما شفت وصفك وحلياك = متواضعٍ للطيب نفسك تهومي
لكن عسى من لامني فيك يفداك = من حرب وإلا من أي صوب ويمومي
واللي يبي يزع يسوي سواياك = ويصير مثلك يالحصان العزومي
يا فزعة اللي من عنا الوقت ينخاك = لا جاك يشكي بالزمان الهمومي
ما خاب ظن اللي من الضيق ينصاك = عانيك من دونه تطيح وتقومي
الله يمد بعمر مثلك ويا قاك = وتبقى لنا ظلٍ ظليل وتدومي
مالك شبيه بين ذولا وذولاك = عندي وكلٍ دون حقه جزومي
كم ضايقٍ فرجت همه بيمناك = لا بان من ضيقه عليه الوسومي
الله على طيب المواقيف يجزاك = بالخير في جاه العزيز الرحومي
يا شيخ أنا ما شفت وصفك وحلياك = ولا أنته من اللي يرفعون الخشومي
حصلتها من طيب ساسك ومجناك = دايم وقسمك من خيار القسومي
وهذا يا أبن رداس فعلك ويزهاك = لك في مجال الطيب جزل العلومي
الطيب والمعروف والجود مبداك = فطره فطرها فيك منشي الغيومي
الله يبيح اللي على الطيب رباك = يالمنكب اللي دون ربعه دحومي