أنا ليـا ضاقـت علـي المحاريـف=ماني على بـدع المثايـل كتومـي
آخذ على زيـن المثايـل تصانيـف=ما طاب وإلا الشين مالـه لزومـي
خصاً ليا عديـت روس المشاريـف=في راس لحلوح يكـف الرجومـي
تلعب به الارياح بالقيـظ والصيـف=بس الهبايب فوق راسـه تحومـي
هو منوة اللي حاصل له صواديـف=وعليه من سود الليالـي رسومـي
يلعب به الهاجوس والهجس والطيف=كنه على رأس الطويـل محزومـي
الله من هم سبا الحـال يـا منيـف=وعين تهـل دموعهـا كـل يومـي
حاولت أقنعهـا مروفـة وتخفيـف=وقامت عبايرهـا تشـن الهجومـي
مما لجا بالقلـب بيـن السراجيـف=لاج ولجا ولبسـت فوقـه هدومـي
واكبدي اللي غاديـه كنهـا الليـف=قامت عليـه مـن بلاهـا تزومـي
يالوف قلبي لوف غصن الشفاشيف=تلوفه الغربـي هبـوب وسمومـي
تلوفه الغربي هبـوب وعواصيـف=ومنين ما هب الهواء قـام يومـي
من هاجسٍ بين الضلوع المهاديـف=خلـى معاليـق الضمايـر لهومـي
ضاقت علي سهال نجـد الهفاهيـف=كنـي بحـقٍ باللحـام مختـومـي
من حال والا مـا عليـه تخاليـف=ياللي تبي منـي طرايـف علومـي
ماتمشي الدنيا على غايـة الكيـف=ولا هي على درب السنع واليمومي
تلعب بنا لعب القوارب على السيف=بمصافـق الامـواج والله رحومـي
نوب بها نمشـي بليـا مصاريـف=ونشوف فيهـا بالنهـار النجومـي
نوبٍ تجود وجودهـا فيـه تطفيـف=تبذل لناس وناس عنهـم تشومـي
نعيش فيها عيشة الذيـب بالريـف=نوب بها نفطـر ونـوب نصومـي
متـاع والا ماعليهـا تحاسـيـف=من شدة الحاجـة نطيـح ونقومـي
ناكل ونشرب مارشـرب الذعاليـف=ماطاب لي ماكل ولا طـاب نومـي
واليا بغيت النـوم نومـي تزاييـف=ماينعرف وش صحوتي من حلومـي
لولاي اوسع خاطـري بالسواليـف=واسج الياكثـرت علـي الهمومـي
اسج يـم مدلـه الجـار والضيـف=اللـي محلـه مـدهـلٍ للعمـومـي
لين جناب وبه ملاذٍ عـن الحيـف=مشـرعٍٍ بـابـه لعـلّـه يـدومـي
شيخٍ على مثله تجـوز العجاريـف=ما هو من اللي يرفعون الخشومـي
متواضعٍ كنه على شـذرة السيـف=يمشي بخطة والحشيـم محشومـي
سرحان بن هايف وخـل الملاقيـف=ذيـب العيـال ومسنـد للقرومـي
الشيخ ابو نواف مالـه تواصيـف=ولا اقول شكلـه بالبـلاد معدومـي
والناس كلن لـه فعـول ومواقيـف=وكلن على حقه جسـور وجزومـي
مار انت ياريف الركاب المواجيـف=دايم وقسمك من خيـار القسومـي
على العرب راعي صنيع ومعاريـف=ولا يجـحـد المـعـروف غـيـر الرخومي
ما يجحد المعروف غير السفاسيـف=ضعوف الرجال مضيعين السلومـي
تمـت ولا فيهـا عليـه تكالـيـف=تستاهل اكثر يالحصـان العزومـي