أنا ليـا صابنـي لافـوح=يقبـل بقلبـي ويقفيـبـه
عديت يا منيف باللحلـوح=اللـي عسيـره مراقيبـه
شوفي براسه يجي ويروح=من طول مانـي معديبـه
رجمن لراع الهوى ذر نوح=بـس الهبايـب توميبـه
هو منوة اللي عليه لمـوح=ومطققـاتـن عراقيـبـه
وأنا ترى خاطري مسموح=مالي هدف يـوم أعديبـه
مالي هدف والزعل مطروح=والناس كلٍ على مصيبـه
يا راكب اللي مع الممسوح=جمسٍ تظـارس لواليبـه
نبا نسير لـراع الصـوح=مالي غرض مـار وديبـه
دايم وباله لنـا مشـروح=من طيب ساسه ومن طيبه
زعيمنا الأسمـر المملـوح=عجـردٍ نابتـن شيـبـه
الشيخ نايف بعيد الشـوح=شيـخٍ قليلـه عذاريـبـه
على الصخا والكرم مشفوح=من شاف وجهـه يهليبـه
دايم وبابـه لنـا مفتـوح=نقفي ونقبل علـى سيبـه
نقفي ونقبل بلا مصلـوح=نبـي قبالـه وترحيـبـه
يا مير ياللي بوجهك نـوح=يا راعي الذكـر والهيبـه
أنته بفعل الكـرم ممـدوح=يا معطي الناس من جيبـه
يا الأشقر النادر الذابـوح=حـرٍ عطيبـه مضاريبـه
حرٍ يلوح الحبـاري لـوح=كـن المخاطـر مخاليبـه
من ماكرٍ نادره طحطـوح=كـل القبايـل تشدّيـبـه
تراك ما نته قصير شبـوح=ما كرك عسره مقاضيبـه
عن راس عواد وين تروح=اللـي بعيـده مطاليـبـه
مقدم هل المغتر الشرشوح=اللـي توامـى دباديـبـه
غير السوالم معه مسروح=زعيمنـا اللـي نباهيبـه