واجـر قلبـي جـر قـوس الربابـه=ليا جرها اللي راثعن فيـه هاجـوس
عودٍ يلاعـب قوسهـا مـن عذابـه=قلبه على طـرد العماهيـج ممـروس
ليـا عـوا كنـه صويـب الذيـابـه=متعلمٍ يلعـب علـى شـذرة المـوس
البارحـه بالليـل عـنـدي طـلابـه=نومي على كوعي تقل نوم مضـروس
والقلـب منـي جـاه شـي سرابـه=واصبحت كنه مني العقـل ملمـوس
كريـم يـا بـرق تراكـم سحـابـه=عساه يـزي مـن نواظـر لبلعـوس
جعله على المزنـان ينفـض ربابـه=روَاسهم ياخـذ سبوعيـن مأيـروس
علـى الجماعـه والاهـل والقرابـه=ربعي هل التوحيد وبليـس ملهـوس
دفانـة الركبـه نـهـار الحـرابـه=ماشيف بيرقهم من الغلـب منكـوس
هـذا وكلـن لـه نصيـب ومهابـه=كل العرب فيهـم مهمـات ودقـوس
يابـو فهـد ياشـوق جالـي عذابـه=يازبنهن وان جن عن الضيم والبوس
زبن الضعيف وخيـر مـن يلتجابـه=لياجا على الاجواد خصَه وحاسـوس
جنوب بيتـك تقـل مجـزر قصابـه=جلـود خرفـانٍ جديـدات ورمـوس
تقـل تاخذهـا مـن ذوايـب كسابـه=ماتذبح الا اللي تقل صـدر جامـوس
بيـت الكـرم والجـود نـوَر ترابـه=ياعنك ماهو بيـت عفتـان والعـوس
بيـتٍ بـه الثبتـان لهـم ضبـابـه=عسـاه دايـم دب الايـام مـانـوس
بيـتٍ بنـاه الله وزيَــن رحـابـه=مبني على شيخـه وعفـه ونامـوس
بيـت السليـح لاعدمـنـا شبـابـه=وش عاد لو مالي مع الذود حرسوس
أبمـدح الطيـب ويـكـرم جنـابـه=شيخٍ ولد شيخٍ خـذا شيختـه قـوس
جـده خـذا الفنجـال علـى عتابـه=فعله يفاخر بـه ولاهـو بمدسـوس
غصبن علـى عدوانهـم والصحابـه=له عدِي الفنجال غصبن على الـروس
ولا ينسـى دواس قـفـر المهـابـه=قدام بـدوانِ لهـا سبـر وعسـوس
يجي علـى مـا بخاطـره ماهقابـه=اللي ليا ركبو علـى الخيـل دبـوس
درعٍ لربعـه عـن خطـاة القـلابـه=اللي بعج الخيل ضاري على الـدوس
تاريخهـم مفـهـوم كــلٍ درابــه=جدانهم حطَو علـى القـوم كابـوس
وهـرجٍ بـلا تاكيـد وش ينبغـابـه=لو كـان ماتاخـذ معانيـه بفلـوس
الصمـت حكمـه والتمنـي خيـابـه=خلقك ربك نفس مـن جملـة نفـوس
ولا تامـن انـك تستريـح بخـرابـه=ولا ينومن ضرسٍ دخل وسطه السوس
والسيـف مأيقضـب بليـا نصـابـه=ولا ينكرب حبلٍ وهو قبـل ممسـوس
والنـاس كـلٍ قـد جسمـه ثيـابـه=مأينلبس ثوبٍ وهـو قبـل ملبـوس
تمت وعبَـر ضامـري عـن جوابـه=ولاني على غرات الاجواد جاسـوس