متى يجي يا منيف وقـت الزيـاره=ونزور شيخ بالجنـوب وضواحيـه
شيخ الشيوخ اللـي براسـه نعـاره=اللي يسـر البـال ذكـره وطاريـه
الشامـخ اللـي يستحـق الامـاره=ريف الضعيف اللي سنا الوقت واطيه
الليل عنـده لـون شرقـت نهـاره=والباب دائـم مـا يصكـن روابيـه
كنه علـى البيبـان راعـي خفـاره=من خـوف هتـاش بغـره يفاجيـه
هتـاش ليـلٍ يستحـب الخـطـاره=ترمي به الاقـدار والجـوع يرميـه
يبـا علـى كبـش كبيـر فـقـاره=كبش البخيل اللـي لمثلـه يربيـه
ربـاه اللـي مـا يحـب التجـاره=اللي بدور اليوم مـا درهمـن فيـه
عنـدي وكلـن لـه ثمانيـن تـاره=والنـاس كـل واقـف دون عانيـه
مار الصويتي مطلـق لـه هجـاره=والـدرب قدامـه مخيمـر مسويـه
شيخ الشيوخ اللـي قديـم اعتبـاره=اللي بماض الوقت تذكـر حسانيـه
يوم السنيـن اللـي حلاهـا مـراره=والذيـب فيهـا يابسـات لواحيـه
وابوه ستر اللـي عليهـا انكسـاره=عد مثـل هـداج يـروي ضواميـه
بابه مشـرع لـون بـاب الـوزاره=بالقول ولا ما حضرنـا دواعاويـه
ماقلتهـا ياميـر مـزح وعـيـاره=لا والـذي نـزور بيتـه ونرجيـه
انتـم حمولتكـم تحـب الطـهـاره=بيـت بنـاه الله وثبـت رواسـيـه
مبني على حسـن المكـارم جـداره=على الوفـا وديـن راعيـه بانيـه
مشيـد مبـنـاه مـثـل العـمـاره=بانيه من ربه على الرشـد هاديـه
مخيمر اللي مـا يهـاب الخسـاره=اللي ليـا ضافـوه يذبـح سوانيـه
لو كـان زرعـه مستتـم خضـاره=يوضع بسانيتـه وتيبـس سواقيـه
في ليلتن تضيـع فيهـا الشطـاره=الذيب فيها يدوج والجـوع طاويـه
ومخيمـر الذاعـر يشـب المنـاره=ويرمي بها قلب المطيـه ويشويـه
بين الضيوف وبين ورعـان جـاره=اللي على العـاده تحـروا حراويـه
تلقا الشحم من بينهـم والصهـاره=كـل يدسـم شاربـه مـن تواليـه
من فعل اخـو بنـا وقـوت قـراره=أميرنـا اللـي كلنـا نفتخـر فيـه
ونته محلـه وأنـت شبـاب نـاره=وانت الأمير اللي فعولـه تنشميـه
لـولاك كفـو للـوفـا والـجـداره=ماصرت بالمنصب ونومست راعيـه
مار انت نمر مـن سلايـل نمـاره=ومنصبك يوم انك تنصبـت ماليـه
انـتـه كـفـو للمرتـبـه والأداره=واللي مثل شرواك تشكـر مساعيـه
تمت وانـا تميـت والعلـم شـاره=والهـرج مـاودي تكـرر معانيـه