أقنب قنيب اللي اليا جـاع عـوّى=في راس مشرافٍ يـروح ويتوقـه
في راس مشراف الهوى والسلوّى=عدّا به اللي بس يلحـس شدوقـه
ما ظنتي عـدّا الطويـل يتهـوّى=يبي عساه يشوف شوفٍ يشوقـه
إن شاف زولٍ زال وإن شاف ضوّى=كنّه مبشر فـي عشـاه وغبوقـه
يبي لعـل عـروق قلبـه تـروّى=عقب اليباس اللي تلمس خفوقـه
حاديه برد وليـل دامـس ونـوّى=والا المسافة بعدهـا مـا يعوقـه
ياللي خلقت آدم ويسـرت حـوّى=تفرج هموم اللي دموعـة ريوقـه
يالوف قلبي لوف عشـبٍ تلـوّى=أقفى نباته يـوم جفّـت عروقـه
اقفى نبات العشـب والعـود ذوّى=بس الهبايب تنسف الرمـل فوقـه
والقلب يـا نيّـاف كنّـه يكـوّى=من هاجسٍ بين الضماير يسوقـه
هاجس دخل بين الضلوع وتطـوّى=حاولت به لاشـك عسـرٍ لحوقـه
وانا بلايه داخـل الجـوف جـوّى=من سبت اللـي كـل مـرٍ يذوقـه
نصحت مار انـه بوجهـي تثـوّى=وخلّه على ما قيل يشرب مروقـه
ودنياك يـا نيّـاف مـا تنتسـوّى=ازرى بها طبّ الحكيـم ونشوقـه
قامـت علينـا كـل يـومٍ تقـوّى=وتصفق بنا الجيلان ماهي رفوقـه
لاشك ما يـدري خطـاة المغـوّى=اللي على نفسـه يدلـك نطوقـه