يقولون سداح العتيبي يثير الشوق=بصدر الهجوس للي من الله موهوبه
ومن منطلق ماشفت يالشاعر المرموق=سرى هاجس الافكار وافتر دالاوبه
قريت القصيد للي معه كل فكر ايتوق=قرايح خيالن عذب مابعده عذوبه
ياحلو القصيد للي يهيظك للطاروق=اذا الجزل له مندوب سداح مندوبه
انا شاعرن معجب بشعرك من المعلوق=يازين الصحيح وكلمة الحق محسوبه
قطفت الفرايد مثل مايقطف الزملوق=وبنيته من الجزلاات طوبه على طوبه
مثل ماحمو ربعك عتيبه خيار النوق=حميته عن الهزلاات واوفيت ماجوبه
ياكثر القصيد للي نشوفه ولا له ذوق=الايام مختلفه ولااوضاع مقلوبه
سلعة(خم وانطل) زودو سعرها بالسوق=وهي في عيون الحق والصح مضروبه
رسايل على الشاشات والسر فالصندوق=ومن شفه المفتاح يرهي من اجيوبه
غدا ثلث راس الشعر بعد ابتلوه افلوق=يصبون منكوسه على راس مسحوبه
ياابلفيت عفريته يخرج وسيع اشدوق=ياحاول يطير ضلع (ابانات) بسلوبه
يغرد من الطاقه من الشوق للمعشوق=يجرد حبيبه كل ماظاق من ثوبه
يعاني جروح الصد من غيبت الغرنوق=وامن النعمه للي فيه مايلتن اجنوبه
وعن مايكن القلب عبرت في طاروق=وكلن يعبر ياولد روق بسلوبه


وهذا رد الشاعر الكبير : سداح العتيبي





علوم العرب لاجات من مصدر ٍ ماثوق=عليها السند ماهيب بالزيف مكتوبه
بعيده عن التلفيق والحنشله والبوق=ومن دونها البيبان بالصدق مضبوبه
مثل ما حقوقي ثابته .. للرجال حقوق=ومن يجحد المعروف قلبه بلغبوبه
أشوف الطريسي ساق كل الفرايد سوق=يتلّ الذوايق لين تمشي على دروبه
لقيته يجر الصوت في قمة الشاهوق=ولدّوا نظرهم مبعدين النظر صوبه
و وقفت أتوحّى فيه .. وأرفع عيوني فوق=وخدّر هجوسي لين راحت في غيبوبه !
هذا والله الإبداع في معجم المنطوق=قوالب ذهب بالسبك والحبك مصبوبه
تمّلك عليها مثل حكم الملك فاروق=على أرض الكنانه يوم شعبه تنادو به
وانا خابره شاعر عن الغير فيه فروق=ومن لابة ٍ مع ساير الخلق محبوبه
عسى الله يعوق اللي يدوّر عليه العوق=له النعم فوق النعم .. واللاش والكوبه
فداك المبابي يا ابيض الوجه والخثروق=يبا يلفت الانظار .. لكنّ وش هوبه ؟
يلوّح ورا المذياع ويسابق المسبوق=وبعد طاح صاح .. وحكّ ظهره بعرقوبه !
لا يزعل على الدكتور غسّان .. بدر صفوق=لجان الشعر في تالي الوقت لعبوبه
لكنّ المثل صادق ومن ينكره مفهوق=ترا الشمس بالمنخال ماهيب محجوبه
تقبّل جوابي يا الشبابي .. وأنا أبن روق=مع أصدق تحيّه بأجزل الشّكر مصحوبه