القلم لنسـاق يعـرف مـن مساقـه=لاعيونن حول لاعيـن(ن) كريمـه
ماخرج عن طوع فكـر ولانطاقـه=لكـن انـه ياصـل قلـوب سليمـه
من ترك سلم العرب قطـاع ساقـه=ومن نطح جيش العرب هذا بهيمـه
ومن تعلق بالعـرب سمـي علاقـه=والهداني من ثقـل حملـه يظيمـه
والكلام يقـاس مـن نـوع اللباقـه=والصدور اقفال ولسانـه خصيمـه
وكل طرف(ن) لاحصل منه انسراقه=النهايـة يلقـى عواقبهـا وخيـمـه
ومن طبخ له سم يعرف وش مذاقـه=ومن يذوق السم يبشـر بالحريمـه
ومن يحس بنار تحرق فـي عماقـه=يتحمـل كـل كيـه فـي صميمـه
ومن مشى درب الزلق عجل انزلاقه=لو تظاهـر بالعفـاف وبالحشيمـه
واه قلبـي ماخسـرت إلا وفـاقـه=ماتعـرض للهوى يبغـى نسيـمـه
جـرح قلبـه كـل يـوم بانفتاقـه=زادت جروحه على جروح قديمـه
كـل ليـل يمـر يرهقنـي غلاقـه=والهموم اللـي تواردنـي عظيمـه
الهجوس تجوس في قلبـي حماقـه=كن قلبي للهجـوس اشـداد ريمـه