قال الشاعر / ساجي التويجري في قصيدة له
____________________________________

يا ليل يا لغـز بـك الفكـر يحتـار=يا حاضر سرك عن االناس غايـب
يا كثر ما يخفي ظلامك من اسـرار=من غاص با عماقك يشوف العجايب
جبّـار وحنيّـن ووافـي وغــدار=افراح واحـزان ونعيـم ومصايـب
احدٍ عليه ارحم مـن الوالـد البـار=واحدٍ شباب ويصبح الصبح شايـب
يا ملتقى الخلان في كـل الاقطـار=يامـا بستـرك يلتقـون الحبايـب
وكم واحدٍ سـاري للأحبـاب زوار=اليا سلـم كسبـان لـو رد خايـب
وياما تحت ظلك بغيـرون الأشـرار=على حلال الناس سـرق ونهايـب
ويا ما من العبرات في وقت الاسحار=يهّلهـا عبـدٍ مـن الذنـب تايـب
وياما قضاك اخر على رقص وسكار=في سترك الضافي له الكيف طايـب
وياما سرى فيك المنافق بالأخبـار=وحوّل سكونك في دقيقـه طلايـب
ياما حلا جوك ويـا كثـر الاخطـار=فيك الصفا واحيان فيـك الشوايـب
سبحان من بامره تدابيـر الاقـدار=ربٍ خلق بك من جميـع الغرايـب
يا ليل يا لغـز بـك الفكـر يحتـار=يا حاضر سرك عن االناس غايـب




___________________________________________



كما جــاراه الشاعر /ابراهيم الحبيرتي فيقول في قصيدته

_____________________________


ياصبح ياجالي دجى الليل بنوار=أنته على قتل الضلام السبايب
ياصبح لو تبطي وتفقدك الازهار=تموت وتصلي عليها الهبايب
لولاك كان الطير بالوكر ماطار=و لولاك ماودا ولاهو بجايب
ولولاك مايمشي على الارض تجار=ولولاك كلٍ بالفقر صار ذايب
ياصبح لوجينا نوصفك نحتار=أنته هبه من عند رب الوهايب
نظيف صافي ماتدنسك الاشرار=لاصار يفرحبك عجوزن وشايب
أحدٍ معك جهز دلالن على نار=من طيب راسه يحتريله صحايب
وأحدٍ معك قضا ثلاثين مشوار=وأحدٍ معك فرحان طيب وطايب
وأحدٍ معك شلع من إديار لديار=يبغى معك يصل الديار العشايب
وأحدٍ معك ياصبح وراد لابيار=وأحدٍ معك لسوق ساق الجلايب
وأحدٍ معك ياصبح قصاص الاثار=مغدي حلاله في جبال وشعايب
وأحدٍ معك ياصبح عساسالامطار=امخايلٍ برقٍ تسوقه سحايب
وأحدٍ نشب بالليل والليل غدار=من بعد جيته زحت عنه النشايب
ياماحلا معك التبادل بالاخبار=في حضرت اللي يحزمون العصايب
يامصدر الارزاق لو سرك إجهار=يقوملك من هو بدنياه خايب
ياصبح لاتقبل من الغايب أعذار=لاجيتنا ميت ولا رحت لايب
غايب ولكن يحزن القلب لاصار=محروم عن تقسيم الارزاق غايب
ياصبح ياجالي دجى الليل بنوار=أنته على قتل الضلام السبايب