الجود يامال الوفا منبع الجود =والطيب والنخوه دليل الشهامه
والذيب يقطع بيد والعالم ارقود =وما فيه رجم الا على الساق حامه
جزل الفعايل واب يده كاسب الفود = مطنوخ في عزمه وينهج ظلامه
فعله ينومس كل من جاه محدود= يثني ومن دونه يورد سهامه
ماهو بجاحد فالشدايد ومجحود =يدفع ثمن عمره بطيب وكرامه
الذيب ذيب ولا يبي مني اشهود = قاله ومن قاله صدق في كلامه
صعب المنال الكل كايد ومكيود = مدهال عز وشامخٍ في مقامه
عشاه روس ابكار من راعي الذود =متربين منها قويه عظامه
ونا خوي الذيب لاهبت النود = ذيبٍ وله منزال في كل هامه
مادام انا والليل والذيب وموجود= بين الخطر نرسم طريق السلامه
ياذيب انا لي موقفٍ معك مشهود= واضح مثل وسق البعير وسنامه
ساقتني الخطوه ومريت باعدود = واقرب مدى للعد تسعين قامه
واصبحت في فيضه وشعبان وانفود= وامسيت في وسط البحر والتطامه
وايقنت بأن الوقت والعمر معدود = يمضي وكلٍ غارقٍ في منامه
افزع معي وابذل من الجهد مجهود = اما قطعت الوقت صابك احسامه
هل تعلم انه ناشفٍ ريقي ابزود = والغيم من فوقي يزيد ازدحامه
برقه مفاتيلٍ وتثويره ارعود = اسود مثل جنح الظلام التحامه
جعله يجي هتان ويخضر العود = وافوز يا تاج الفخر والزعامه
واقطف من اثمار العنب كم عنقود = للجادل المطنوخ زول ووسامه
من عقب انا ما طالع اعيونه السود = قفى وخلا فوق صدري وسامه
ما عاد اشوفه غايبِ عني امدود =يالله عسى المكروه مايوم ضامه
جمعت كل اللي تعلمت بركود = وادرجتها مابين قوس وعلامه
حبه وطن وضلوع صدري له احدود = يفرض علي بطيبته واحترامه
عليه ابقنب مثل ما تقنب وزود=في عاليٍ مابين سهل وغمامه