ياهاجس الشعر بين الناس جملني =الله خلقني ماحب امشي بلا داعي

إصبر على افكاري وحاول تحملني=خذني على قد عقلي وإفهم اوضاعي

مثل ماعاملك قدّرني وعاملني=إرفع معانيك لين ارفع معك باعي

البارح الليل طاولته وطاولني=لين ابلج الصبح صافحني وانا واعي

اخاف من كلمة بعدين تخذلني=وانا شبوحي بعاد ومبعد ارماعي

الشعر في مجمله ماهو بمشغلني=الشعر ذودي وانا المالك وانا الراعي

لو القوافي على المعنى تجادلني=تطيعني كنها المسباح باصباعي

ابا انحت الصخر قبل إنه يزلزلني=وابا اغرف البحر واجمع در بذراعي

وابا ارفع القاف عن شيٍ يفشلني=لين العواذل تبيد ويذهب الساعي

لاشك ابي شي لاقلته يمثلني=يسيل به صيفي ليا جف مرباعي

يرقى معي لين للقمّه يوصّلني=واسمع صدى راعده ويشنف اسماعي

الناس لامال قولي ماتجاملني=قبل ادخل الباب افكّر وين مطلاعي

وان مت بعد القصيد الله يحللني=انا اشهد إني تركت الجزل للناعي



..=..