بالله ياللي معي تطرق دروب الغرام = دوّر على واحدٍ غيري وتلقى بديل
أنا تركت الهوى ماعادني مستهام = ودربٍ تركته عليه أعود ذا مستحيل
أنا بهمٍ ملازمني لعدة عوام = أقضيت عمري وأنا وإياه حط(ن) وشيل
يرودني كل مايسدل جناح الظلام = ويروح ليلي تنهاد ونين وعويل
ماهو من أدنى الأمور من العظام الجسام = أزرى الجبل لا يشيله واحتملت الثقيل
في عالمٍ ملتقاه معادل الإنقسام = نقطة نظامه تعادل مستواه الهزيل
يشوم عنه النزيه وتغتنمه اللئام = يموت فيه الكريم ويستعز البخيل
عرفت من واقع الأيام شيب الغلام = وأخذت بعض التجارب للطريق الطويل
وحطيت فوق الورق بصمة براس البهام =يعدها جيلنا للي بعدهم بجيل
لاشاب راس الرضيع اللي بحتن الفطام = يجيب عنّا الكلام اللي يسر القبيل
كنه على صفحة الأيام بين العوام = في كل صفحة يحصّل عن جدوده حصيل
من بعد هذا عسانا ياعرب مانلام = لا قلت قفّلت قلبي عن غرام الكحيل