سلمى من الصمت قلت ارتعك ليل وحبيـب= تباشريبي ،، دخيـل اللـي لفـاك وزبـن
يكفي لبوحـي تخيرتـك وجيتـك غريـب= من فوق قب الحكي ،، يمسك جروحه رسـن
جيتك بليا شموخي في عيـون الصحيـب=اشيل ضعفي من الحسره وعظمـي وهـن
جيتك وكبتي غدى واقع خطاي المصيب = قلـت اتفيـا بسـدرك واشتكـي للركـن
احترت من وين جوع الحرف يبدى القنيب= لقيت قلبي هو اكثر مـن يعيـش بسجـن
واقبلت والسيل انا وانتي لبوحـي شعيـب= يستوعب الماء وتجريحه ونزف المـزن
سلمى تعبت انتظر جـرح الليالـي يطيـب= ولاسليـت الوجـع ،، ولاعيونـي غفـن
ماغيـر امنينّـي فباكـر ،، وباكـر قريـب= ياليتـه ابعـد ! وخنجـر هقوتـي ماطعـن
سلمى سوالف خفوقـي فالطريـق الكئيـب= كان الصبر حمل مالـي فالعواطـف متـن
سلمـى وحظي يودي بالهمـوم ويجـيب= بعـيد عن مذبحـة رمِشـك وفيّ الحـضن
من جدي اللي صبر والوقت مـر وصعيب= يوم ان خلق الولي تـرضى بتمـر ولبـن
ورثت كـفٍ يشجعـني عـلى كل طيـب=ولاورثـت الجـلاده في دروب الحـزن
سلمى وانا المرهف المعـشب طعـون ونحيب= والمثـقل سهاد واحـلام وبحـور وسفـن
سلمى على العذق لي تمره وكفي صويـب= مدي يدينـك بدالـي لـو دفعـت الثمـن
بعيش لطفـك وامانـه هقوتـي لاتخيـب= مليـت الاوتـار تقنعنـي بحـزن اللحـن
سلمى وقلبي طفل يلبـس ثيـاب المشيـب= وانا اكبر اطفال هالدنيـا ، وهـذا الزمـن
انـا الفـواد الحـزين الممتلـي باللهيب = انا عـيونٍ ورى كـل ابتـسامـه بـكـن
سلمى لو اموت ، وفراقي يصير النصيـب= قولي لهم وش تغّيـر مـن زمـان بكفـن
ماكان مثل البشر عايـش وكونـه رحيـب=ولآ بمنفـى ،، ولاحتـى يعيـش بوطـن
سلمى يقولون : جرح الحب مالـه طبيـب= وشلون اجل طابوا احبابي وشـح الجفـن
اللى لهم فالحشـا خفقـه وروض وقليـب=ورجمٍ غديـت لهبوبـه فالشدايـد غصـن
دايم يقولون : نور الشمـس لازم يغيـب=وانا اتساءل ونظراتـي ضفـاف الشجـن
سلمى وش الشمس ! قومي وضحي للغريب= [ انا اعرف الليل من يومي بعمـر الحـزن ]