ايه اذرف الدمعة ولا عاد لي حيل=وش حيلتي يا ربع ماني ابقاوي
خل الدموع اتسيل تملاء المناديل=حتى تصير امن المحاجير خاوي
ابكي على طحطوح كل الرياجيل=خالي زبون الطيب راع الهقاوي
روح ولا فيها شكوكًا وتأويل=والموت ما يعرف فقير اوغناوي
لا حل يومك جاك ما فيه تأجيل=ولا هي تفيدك لو تجيب العزاوي
دنيا لها في كل دارً مداهيل=ياما وياما من كثير البلاوي
منها يجي بعض العنا والبهاذيل=والقلب يصبح من عنا الوقت عاوي
والعمر زرعاً والفعايل محاصيل=كلً على فعله يجازى جزاوي
والموت درباً مالنا عنه تمييل=ما يقدره طب الطبيب المداوي
مرحوم ياللي كل قوله تماثيل=اللي على درب الكريمين داوي
راع الوفا يعرف دروب المشاكيل=حكيم ما يسمع كلام الزراوي
جانا الخبر فجأه بليا مقابيل=لا هو على بالي ولا له حراوي
وقت الظهر جتنى جميع التفاصيل=حتى تبين كل شيً خفاوي
في شهر تسعه فارق الصبح والليل=تاريخ تسعه كلها بالتساوي
في يوم جمعه صارت موته تساهيل=على فراشه وسط بيت النداوي
ويا كثر والله ما سمعنا الأقاويل=بس البلا عيت تفيد المناوي
أحداً توفى من مرض له معاويل=يقضي شوي اشوي والجسم ثاوي
واحداً جعل موته بدقه وتفصيل=موتاً طبيعي ما دخله الملاوي
راع الكلام الزين حلو التعاليل=(صالح) لكل الطيب والصدق حاوي
لا حل مدات الوفا ما هو ابخيل=رجل العطا والجود رجلاً حماوي
يالله عسى قبره تمشي له السيل=ويخضر جنابه من قراحً صفاوي
وتجعل له المنزال بين المنازيل=في جنة الفردوس بيتاً نقاوي