المواني بعيده والمجاديف كلت = يا هجوس الهقاوي ليه كليتها
الله اللي يجازي !!من سوايك ملت = اليدين السخيه وانت مليتها
والعيون النعيسه دمعها يوم هلت = من بعيد المسافه ليه هليتها
شفت وقتك قسى والمبهمات استحلت = كل نشوه !!بدايه واستحليتها
في قديم الزمان السالفه ما تولت = ويوم جتك المغازي ما توليتها
شد بيت القصايد والرشا يوم دلت = تجذب الماء وانا القيفان دليتها
في عدود ن كثيره والمحاله تفلت = بين طيانها والقاع خليتها
لصديق الصدوق احبالها ما تخلت = يا نديب الضمايا في جواليتها
لا يهزك زمانك والسما لو تجلت = باكر يلوح براق الحيا ليتها
والعنيده مداها لثرى لا تغلت = والصعايب يقول الذيب حليتها
اشهد ان الوداع سهوم رمحه تعلت = وانت منته ب لكن ولا ليتها
انت شامخ وهقواتك على الناس ظلت = يا ملاذ الهقاوي وانت ظليتها
شوف خطوات غيرك فالمتاهات ضلت = وشوف هقوات غيرك يوم شليتها
سامح الله عباده فالخطى يوم زلت = وانت بإذن الولي خطوتك عليتها